Main Menu

سید ظہور شاہ ھاشمی

نہ چاراں من ترا

نہ چاراں من ترا ھجبر تئی چمانی سوگند انت
بلے شکّی مبئے چمّن ترا دردانی سوگند انت

کَشُکّی شانک مَدے چمّانی تیراں من نہ سگّان اِش
ترا ھانل منی دوریں دلءِ ٹپّانی سوگند انت

مزن بھمانگی گپّے ، ترا گلّوتگاں گِپتگ
تو چمن چیر مدے دیدگ، ترا ارسانی سوگند انت

بگوش، گپّ جن، کہ پہ تئی شکلیں گالاں دلوں بند انت
کہ بے تاھیریاں زُرتگ ، دلءِ لھڑانی سوگند انت

نہ داراں من گلکگ ترسءَ کہ نازینکیں دل ات دور بیت
کھیبانی پری، دابانی مھرنگانی سوگند انت

دو پنجاہ زندمانی گوں تو گپّ ءُ ترانےءَ بکشاں
منءَ تئی شکلءُ شیر مینگیں لنٹانی سوگند انت

ترانگ ءَ کار ایت منیگءَ

ترانگ ءَ کار ایت منیگءَ کد ءُ بالاد ءَ تئی
سُھب ءُ بیگاھے نہ چار ایت دل منی یادءَ تئی
 
دل زھیرانی پدءَ  انت، ھچ دلگوشی نہ زانت
تلوس ایت ءُ تلوس ایت پہ گندگءُ نیادءَ تئی
 
تئی کلوہ ءُ دروت بے گنجیں سرئے کُرت انت پَمن
کُنٹیں کارچےءَ گوں کشتءُ شُت منءَ سیادءَ تئی
 
تئی زھیراں دل کد ات چار گال آتک اَنت ھاترءَ
ٹیکیاں دستگر کہ دلمانگ نیاں داد ءَ تئی

ناگمانی چست بنت

ناگمانی چست بنت در کاینت اُپارگ منی
من دپءَ داراں نہ بیت دل لھڑ جنیں دارگ منی

تئی گماں گاراں منی رنگ تر اِتگ زرد ءُ زلور
گران کپتگ  دژمن ءُ دلواھاں پجارگ منی

ھچ ترا باور نہ کنت پمن تشے بزگ نہ بیت
دژمناں جوریناں اوشتارینگ انت نارگ منی

چاردہ الاھیگیں شپ تئی ھاترءَ سھبوں کتگ
دیمترءَ گونمن نہ بیت ھچ رنگءَ دل دارگ منی

چم پر مھر ارسان ریچ انت لھڑ جنت دل پہ زھیر
دوست سھڑین انت منءَ ءُ من کداں بارگ منی

چہ وتءَ ھچی نہ ساراں نی منءُ بھریگ منی
باوری گپے نہ انت اِے گرمپک ءَ شارگ منی

پہ گدارے گڈ چہ من کسے بگندے پہ وت ءَ
باید انت مرگءَ چہ پیسر یک برے چارگ منی

ساہ منی درنئیت ھانلؔ تاں نہ گنداں من ترا
دریں نامءَ تئی گِراں بیت شھادتءِ آرگ منی

تْرانگ ءِ ارس شَلان ءَ کاینت

تْرانگ ءِ ارس شَلان ءَ کاینت
زِری چَول اَنت کہ پْرشان ءَ کاینت

تئی تْرانگ تئی تھتال ءُ زھیر
ماں دل ءَ بندوران ءَ کاینت

کینگ ءُ کَست نہ ساچ اَنت ھَمُکءَ
دوستی ءُ مِھر گوں شان ءَ کاینت

کوشءُ وتکوش ءَ نہ بنت راست اگاں
لَجّ ء َ پہ زَرّ دیان ء َ کاینت

کئی ھوشام ءُ ھلاھوشءِ دْرد اَنت
دیم پہ ھِمر آسیں گِدان ءَ کاینت

اوہ کہ بے سوبیءَ تْراسینتگ جھان
گُلیں سوب اَنت کہ ھَسان ءَ کاینت

گِر پداں شار ءِ وتی نوردیدار
پْریشتگ دْرنز دیان ءَ کاینت

دیم پہ مَرگ آدْرھیں زِند اَمبازاں
مِھر ءِ ٹَپّیگ ھزان ءَ کاینت

تَنگواں ھالو ھلو یے زُرتگ
آسنیں سَنگہ تِْرپان ءَ کاینت

زِند زَرشانیں ءُ مَرگ ایرجیگیں
گرمیں گونڈل چَہ نِوان ءَ کاینت

گم ءُ اندوہ ءِ ابد گُژن ءِ مزار
واھگ ءُ زِند ءِ نِکان ءَ کاینت

رَنج ءِ بشّام ءِ دْردانی گونڈل
مُنّھیں داگ دیان ءَ کاینت

چَہ گُلیں دیدگاں مِھرانی کمار
شِلّیں تیراَنت چَہ کمان ءَ کاینت

روچ گوں دَرد ءُ ھلاھوشاں گْوز اَنت
شپ چو سْیہ دیھ ءَ جُشان ءَ کاینت

مِھر ءِ گونڈل سر ءُچمّان اَنت سیدؔ
پِھر کنت چَمّ سر ءِ بان ءَ کاینت

اے تاک ءَ سوشل میڈیا ءَ شنگ کنئے