Main Menu

توکلی مست

زیانہو پروئیاں بغائیناں
ھوندا ھیران ءُ دور ھرامیناں
رَہ گُزاں سمو گْوستہ پہ ریما
دوست منی روث ماں پنگھر ءِ دیما
لھر منی جان ءَ ریز گراَنت ماری
موژ ءَ کنت روح دل ھزار واری
شائری نوخیں کِسّویے کاری
شُوا نہ زانئے مئیں کیغذ ءَ ڈؤل ءَ
دوست مئیں بازیں خذمثاں لوٹی
چیٹ ءَ لوٹی چو تنگویں بچّی
سانب ءَ لوٹی چو شیر دفیں بھاناں
سانب ءَ لوٹیث ءُ سانبغ ئِے جواناں
جواں نہ اِنت سمو گوں بُزگَلی مڑداں
بیثیں گوں دُرگوشیں مھیریاں
لڑزثیں استار ءَ سُھیل ئیغ ءَ
ٹلّثیں دوست ماں گَزدریں بیٹاں
ماں ھواں درنگانی بزیں سایاں
دنز کُثیں تیرغ چڑتغیں بوراں
ھنڑ کُثیں شیرواریں لکوریاں
درنزثیں زڑدواں سھاگیناں
بیگھاں تْرانپولی کُثیں ھِرّاں
شئیر جثیں ماخ ءُ آہ کُثیں ملخاں
آہ کُثیں ملخان ءَ سمین ئیغاں
بیگھاں استین کہ مُژاں بند اَنت
بانگھاں عرشی کوکر ءِ گْرند اَنت
گِندغ ءَ کڑز اَنت چو عجب رنگاں
کرمو ءِ تنک ءَ گْور توا گواراں
گْوار اَنت ءُ ھمبوئیں سلام باراں
پاذا کئیث دردانغ املّانی
روث گْور سرگْواثاں سمین ئیغاں
زیارت ءَ کنت گوں لیلوَیں دستاں
پیالوے نوش کنت کاغذیں رکاں
یکے پہ واستایا حذائی ءَ
یکے پہ نیت ءَ گنوخ ئیغا
بیایاں مئیں تُنّی ئیں دل ءَ پُجّاں

شوہازکار: مجید آجز

مکرانی گالوار ءِ نبشتہ
زیانہو پروئیاں بگائیناں
ھوندا ھیران ءُ دور ھرامیناں
رَہ گْوزاں سمّو گْوستگ پہ ریم ءَ
دوست منی روت ماں پنگھر ءِ دیم ءَ
لھر منی جان ءَ ریز گر اَنت ماری
موج ءَ کنت رُوھ دل ھزار واری
شائری نوکیں کِسّہے کاری
شما نزان ئے منی کیگد ءِ ڈؤل ءَ
دوست منی بازیں ھِزمتاں لوٹیت
چیٹ لوٹیت چو تنگوہیں بچّی
سانب لوٹیت چو شیر دپیں بھاناں
سانب لوٹیت ءُ سانبگ ئِے جواناں
جْواں نہ اِنت سمّو گوں بُزگَلی مرداں
بیتیں گوں دُر گوشیں مھیریاں
لرز اِتیں استال ءَ سُہیل ئیگ ءَ
ٹِلّ اِتیں دوست ماں گزدریں بیٹاں
ماں ہما دْرنگانی بزیں سایاں
دنز کتیں تورگ چرتگیں بوراں
ھنڑ کتیں شیر واری لکوریاں
دنزاِتیں زردواں سھاگیناں
بیگھاں تْرانپولی کتیں ھِرّاں
شئیر جتیں ما ءُ آہ کتیں مَلِکاں
آہ کتیں مَلِکان ءَ سمین ئیگاں
بیگھاں استین کہ مُجاں بند اَنت
بامگْوہاں ارشی کوکِر گْرند اَنت
گندگ ءَ کرز اَنت چو اجب رنگاں
کرمو ءِ تنک ءَ گْورتوا گْوار اَنت
گْوار اَنت ءُ ھمبوئیں سلام بار اَنت
پاد کئیت دردانگ املّانی
روت گْور سرگْواتاں سمین ئیگاں
زیارت کنت گوں لیلَویں دستاں
پیالویے نوش کنت کاگدیں رکّاں
یکّے پہ واستایا ھُدائی ءَ
یکّے پہ نیت ءَ گنوک ئیگ ءَ
بیاینت مئے تُنّی ئیں دل ءَ پُجّ اَنت

سمّو ژہ زین ءِ پیِپلاں یکّے
سمّو شہ درشکانی براں یکّے
سمّو یک شیشہ یے شرابانی
سمّو یک سروانے تلارانی
سمّو یک سُہر پُلّے انارانی
سمّو یک ڈیوایے تہارانی
یا جڑی بوٹی یے رگامانی
ریٹویں چم گوں کاگدیں رکّاں
تیز اَنت چو کنڈیاں بہوکیناں
شرّ اَنت چو کتّار بستگیں نوداں
وشّ اَنت چو میشی شکّلیں شیراں
سمّو یک انجیرے مزن تاکیں
رُستہ ماں ارگونیں گر ءُ گَٹّاں
جَکّ اِتہ دْرنگی سا سرے سارتیں
کوہ سر ءُ کُمبانی تڑ ءَ رُستہ
ھندئِے ماں جیہین ئیں گراں بیتہ
سر تئی ہچ گْوات ءَ نہ چنڈینتہ
بُرز کنت ھونی رَتکگیں چمّاں
شپ گروکے گوں لاگریں شینکاں
چمّ ئِے چو ڈیوایاں بلوکیناں
زلپ ئِے چو سِیہ ماراں تلوکیناں
سمّو گوں چمّاں سُہر خماریناں
لالیں ژہ جیڑی آں امُلّیناں
ھینژی چو واسنگاں چھلوکیناں
ٹیلی چو سرواناں تْرھوکیناں
زُواریں چو مَہریاں رھوکیناں
وجّی چو شہنایاں دموکیناں
لانٹ کنت پرّایاں گروکیناں
جنت ہِنّیاں شہم گروکیناں
دْراہ کنت مرکیاں مِروکیناں
دست گیپت بالیاں گْوزوکیناں
ھوش کنت بے ھوشاں گنوکیناں
تْرند کنت ریلیاں پھروکیناں
آسکاں نرم ءَ کنت ترھوکیناں
ملّگی ڈیلّ گوں ریشمی جرّاں
دْروشم ءَ دنت چو تانہی نوداں
چمّ ئے شرّ اَنت گوں تنگویں دیم ءَ
بمبویں جاد گوں بارگیں سْرین ءَ
تْرنداں چو آمڑ داتگیں تیگ ءَ
لاشکیں سمّو گوں بُزگلی مرداں
بئیتیں گوں دُر گوشیں مہیریاں
ھندئِے بیتیں مأں کور دپی بیٹاں
بیگہاں تْرانپولی کتیں ہِرّاں
رونگ اِتیں زردواں سہاگیناں
دنز کتیں تیرگ چرتگیں بوراں

دوست چہ جاندران ءِ لیمبواں یکّے

دوست چہ جاندران ءِ لیمبواں یکّے
رُستگ ماں ارگونیں گَری سایاں
دروشماں دات چو تانہی نوداں
د‌رپشیت چو سر گْواتاں سمین ئیگاں
شمب ژل اَنت ئِے چو زامُری چیڑاں
پَنّ ئِے شرّ اَنت ماں تنگویں دیم ءَ
دار ھُمار اَنت ماں بارگیں سْرین ءَ
تْرند اِنت چو آمڑ داتگیں تیگاں
بِرّ اِنت چو سرواناں گیابیناں
سُھر اِنت چو سُھرپُلّاں انار ئیگاں
سارتیں چو کَہن آپاں سُھیل ئیگاں
جکسیت چو پُرزایاں گروک ئیگاں
واجہ پہ توپیکیں دل ءِ زیر اَنت
پہ یزیدانی جنگی سامان ءَ
میکائیل نودانی مھانڑائیں
وت پڑیانی واگ ئِے ماں دست اِنت
بئیت تُراناں چو سانوڑی سیراں
مھرواں بیت ءُ پتنڑاں گواریت
وت مراد وندانی مراد پُجّیت

شوہازکار: مجید آجز

اے تاک ءَ سوشل میڈیا ءَ شنگ کنئے