Main Menu

شپ- زبی زیڈ زار

دیر آزمانءَ استال چمان انت ءُ نوکی بامءِ رژن تالان بوان انت یا اگاں چم نَز بوتگ انت ءُ کُوس ءُ مچاچانی میانءَ مان اڑتگیں ارسءِ تْرنپ تپرگءَ انت ھدا بزانت اے چی ئے چموکیں استال ئے یا ؟ آ چہ دریچکءِ شمءَ ھمئے ندارگءِ جہلانکیءَ ایر کپت ءُ وتئی مارشتانی سرا حاکمی کنگ اش بِنا کُت، بازیں پکر ءُ مارشتاں مانو واب برتگ اتنت آ چہ وتئی تہنائیءَ دل سیاہ ات مدام وتئی کسانی ءُ احدءِ یاتانی تہءَ اے لنجیں شپاں سہب کنان ات، مانوءِ اے اسرارانی ءُ مارشتانی پُشتءَ آئیءِ حدامرزئیں پتءِ دست مان ات کہ کسان سالیءَ مانو آروس اش دات بیچارگیں پت ھم آرواسءَ پد پنچ ماءَ رند بیران بیت بلے بدبہتیں کسمتءَ وپا نہ کت مانوءِ جود پہ لاپءِ شوھازءَ دراں ڈیھءَ رھادگ بیت ءُ پدا نہ اتک، مانو شانذدہ سالءِ امبرءَ جنوزام بیت آئیءِ روچ چہ شپءَ گیشتر تہار اتنت، مانوءَ درائیں روچءَ ارس ماں دیدگاں داشت انت ءُ شپءِ سیاھیں چادرءِ اندوھانی تہءَ تہنا گریت مانوءَ کہ ھما واب دیستگ اتنت آ درائیں واب بے مانا بوان اتنت، چاگردءَ آئیءَ ھجبر دریچکءِ پچکنگے اجازت ندات بلے آئیءَ چہ دریچکءِ شمءَ آزمانءِ ندارہ کُت، ما ءُ استالاں آئیءِ گم مار اتنت بلے چاگردءِ جاھمننداں ءُ بنی آدمءِ حقءِ گپ جنوکاں آئیءِ گم مارات کت نہ کتنت، اے گپ جیڑگی گپے کہ جنین آدمءِ ذندگی مئے چاگردءِ تہءَ پرداءِ تہءَ بِنا بیت ءُ پرداءِ تہءَ ھلاس بیت، مئے چاگرد کور، کَرّ ءُ گنگانی چاگرد انت، ”مرچی سالءِ پُرئیں سرجم بیتگ کہ تو شتگے انگت آھگے نامءَ نگرے نہ منی ترانگاں کپے، نہ کہ شور جتگ، تو کہ ھما روچی سرگپتگتےمن ترا گشت بدار کہ انگت دل ستک نہ انت بدار کہ انگت من کسان آں بلے تو منی گپ گوش نداشت ءُ ھبر وتئی کُت منءَ تہنا یل دات گوں منی بے نَپیں حیالاں ءُ منءَ بندیگ کُت اے ناتوامیں ءُ نادرائیں چاگردءِ دودانی تہءَ، من جزماں کہ منی اے بے تاھیری ھلاس بیت ءُ نوکیں ادلتانی تہءَ من یک برے پدا بانور باں بلے دوبر بانوری منی گڈسری واھگ نہ انت‘‘،مانو سُنٹ پہ سُنٹ ات، گوں وتئی بھتءَ گِلگ کنگءَ اَت، دلءِ زنگاں گوں ھلوت کنگءَ ات، تنیگہ آئیءِ سُنٹ پہ سُنٹی ھبر ھلاس نہ اتنت کہ آ گوں ماھکانءِ تابءَ دل گوش بیت چہ دریچکءِ شمءَ لَٹءِ دْروشمءَ آئیءِ نپادانی سرا مان آیگءَ اتنت، ماھکانءِ تابءِ بْرانزانی تہءَ گُبار بال کنگءَ اتنت ءُ برے وڑے نپادانی سرا کپگءَ اتنت، ’’ما، ، ،ھ ھ ھ ھل،، بگندے اے دنز ءُ مُج تاک چنچو آزات انت بے پکر روچ ءُ شپ برے ادءَ ءُ برے اودءَ بال کن انت‘‘ مانوءَ لپرزانءَ ھمئے رد زبانءَ آورت انت ءُ ھمئے مُج گوں دستاں شِنگ شانگ اش کت انت، بلے دنز چہ چمّانی دیمءَ دیر اش کت نہ کت انت دنز درائیں گسءَ بال کنگءَ اتنت فقط بْرازانی تہءَ دستءِ شار دیگءَ کجا گار بنت، آئیءَ وتئی چاگردءِ جاورانی سرا جیڑگ بنا کُت، ’’من زاناں مئے چاگردءَ ھمک سہمے جنین چُک ءُ جنین آدم ہمئے جاورانی آماچ انت‘‘ مانو یک برے پدا وتئی بے نَپیں حیالاں گوں وتئی گم ءُ اندوہ درشان کنان ات۔

شپ وتئی گُڈّسری سیمسراں آتک بامءَ وتئی بْرانز تالان کتنت، بلے تنیگہ مانو واب نہ کپتگ ات، بازیں پاناتءِ بدل کنگءَ پد پاد آتک ءُ شُت دیم پہ تاس ءُ آپءَ اولی رند انت کہ تاسءَ دپ نہ جَتی آپ اش چَنکاں ایر ریتک ءُ تنگ اتنت یے ءُ شت وتئی پیتیءِ تہءَ چہ یک نقد ئے ءُ وتئی وانگ جاہءِ نا سرجمیں دپتر (کاپی) اش زُرت ءُ چندے حیال نبشتہ اش کُت پدا آورتی ءُ ہمئے میراسءِ تہءَ ایر کُتی ءُ شُت وتئی نپادانی سرا وپت، شپ ھلاس بیت، بام بَرکت بیت سُہب مستاگی اَت، مانو تنیگہ وتئی نپادانی باھوٹ اَت، وھد نہ گوست ھرکس چہ وابءَ پاد آتک وسیگءَ گَلے کُت کہ مانوءَ پاد کناں کہ چاہءِ بگراد ایت، بلے مانو پاد نیتک، ما، ، ، ھو ، او، ما، ، ھو ! پادءَ وسیگءَ لپرزانءَ درائینت بلے نہ جواب مانتریت ناکہ مانو پاد آتک، وھد نہ گْوست مردم مُچ بیت انت، روچ آتک ٹِک بیت ءُ پدا یک پکرءِ کَڈ کنگ بیت پدا چندے حیال پرامواش کنگ بیت انت، محلوقءَ مانو گوں بے نَپیں مارشت ءُ حیالانی پَجّیءَ حاکانی تہءَ بار دات، ہرکسءَ وتئی دودانی پدگیری کُت ءُ وتئی حیال درشان کُت انت، ھرکسی دپءَ ھمئے یکّیں جُست ات مانوءَ چی بیتگ ؟ ھردومی مردم وتئی مارشت ءُ سبباں درشان کنگءَ ات کسیءَ مرگءِ سبب دلءِ گِرگ کُت (ہارٹ اٹیک) کسیءَ نیمون ءُ کسیءَ گْوشت کہ روچ یے ھلاس بیتگ انت، بلے بژن انت کہ اے گونگ، کَرّ ءُ کوریں چاگردءَ مانوءِ مرگءِ سبب شوھاز کُت نکت، ہرکس گوں وتئی حیالاں شنگ شانگ بیت ءُ ہرکسءَ مانو پہ مدامی انچیں جائیءَ یل دات کہ پدا واتر نکنت۔

مانوءِ مرگءَ پد وسیگءَ مانوءِ میراس ( پتینک) پَچ کُتنت ءُ پَچکونڈ اِتنت چہ ھمئے پتینکانی تہءَ یک نبشتانکءِ دراتک نبشتانکءِ تہءَ چندے لبز نبشتگ ات، ’’منی گُڈسری واھگ آزاتی انت چہ منی بے نَپیں حیال ءُ مارشتاں چہ ھمئے بیماریں چاگردءِ ذندانءَ کہ ھیشیءِ تہءَ فقط جنین بند کنگ بیت۔

نبشتہ کار: زبی زیڈ زار

نبشتانکءِ باروءِ وتی ھیالانی درشان کنگءِ واستءَ جہلءِ کمنٹس بکسءَ بنشتہ بکنے۔

اے تاک ءَ سوشل میڈیا ءَ شنگ کنئے


« ( (Previous Post) پشتءِ نبشتانک )
((Next Post) دیمءِ نبشتانک ) »



Leave a Reply

Your email address will not be published. Required fields are marked *