Main Menu

سلیمانی گالوار ءِ ساچشتاں مکرانی گالوار ءَ نبشتہ کنئگ ءِ راہ ءُ رھبند چے اَنت ؟ – مجید عاجز

سلیمانی گالوار ءِ ساچشتاں مکرانی گالوار ءَ نبشتہ کنئگ ءِ راہ ءُ رھبند چے اَنت ؟ ۔ اشی ءِ ارزان تریں رھبند چے بوت کنت ؟ ۔ ہما آب کہ مکرانی گالوار ءَ یا سید ءِ سیاھگ ءَ نبیسگ بوت نہ کن اَنت ۔۔۔ آ ث ۔ ف ۔ خ ۔ ذ ۔ واوو ۔۔ کہ مکرانی ءَ واب نبشتہ بیت ، شرواوو کہ مکرانی گالوار ءَ شراب اِنت ۔۔ ءُ اے دگہ آباں وتی گالوار یا سید ءِ سیاھگ ءَ اگاں نبشتہ بہ کنئے ۔۔ گڑا ۔۔ کثہ ، کتہ یا کتگ ۔ آف ءَ آپ ۔ گنوخ ءَ ، گنوک ۔ پاذ ءَ پاد یا نوذ ءَ نود نبشتہ بہ کنئے تہ باکے نیست ۔۔ بلئے بیاکہ ادا جیڑہ دگرے ۔ شائر ءِ شائری ءِ جند مٹینگ بوتگ ۔۔۔ چو کہ بمبویں جاد گوں بارگیں سْرین ءَ ۔۔ اے وڑ کتگ کہ
بمبویں جاڑ گوں بارگیں سْرین ءَ ۔۔
اراں ادا قاضی گُشت کنت جاد پکّا ھمے جاڑ اِنت ؟ یا سید نبشتہ رھبند ءَ جاد نبشتہ بوت نہ کنت ؟ دومی
تیرغ چرتگیں بور ءَ
اگاں مکرانی ءَ نبشتہ بہ کنئے گڑا
تیرگ چرتگیں بور بیت ؟
یا
تیگاں چرتگیں بور ؟
سمو یک دْرینے جَکّیت ماں آپ بندیں جُڑاں
قاضی ءَ نبشتہ کتگ
سمو یک دْرینے جَڑکیت ماں آپ بندیں جُڑاں
جَکّیت ءُ جڑکیت دو جتائیں لبز اَنت ءُ سید رھبند ءَ جَکّیت پہ جوانی نبشتہ ھم بوت کنت ۔۔
دگہ یک شئیرے
یہ جڑی بوٹی یے رغامانی
اگاں اے سید رھبند ءَ نبشتہ کنئگ بہ بیت گڑا بائدیں
یک جڑی بوٹی یے رگامانی
نبشتہ بہ بیت بلئے قاضی ءَ کتگ ۔
جڑی پُٹّویے رگامانی
قاضی ءَ وھدے جست کنئگ بیت ۔ تہ آئی ءِ گْورا ہچ چشیں منّانکے نیست ۔ کہ مردم دلجم بہ بیت ۔۔ ناں آئی ءَ مست ءِ سرا چشیں پولکاری یے کتگ کہ مردم بگشیت بوت کنت ۔۔ مٹھا خان مری یا شاہ محمد مری ءِ نزّارتگیں مست ءِ شئیراں کتابت ءِ رَدی بوتگ کہ قاضی ءَ رَدی گپتگ اَنت
بہ گُپت ء قاضی اراں مست ءِ شئیر مست ءِ دور ءَ نبشتہ بوتگ اَنت کہ ما باور بہ کنیں ؟
کہ سد در سد ھمے وڑ اَنت کہ مٹھا خان ءُ شاہ محمد ءَ نبشتہ کتگ اَنت یا نزّارتگ اَنت ؟ بوت کنت اے وڑ مہ بنت ۔۔ اے واجھاں چہ ہما کماشاں اش کتگ اَنت یا چہ پھلواناں یا مٹھا خان ءِ گشگ اِنت کہ آئی ءَ بازیں شئیر نواب اکبر بگٹی ءَ چہ دست کپتگ ۔
بوت کنت سر جمی ءَ آ وڑ نہ اَنت ۔۔ بوت کنت اشانی بازیں کَڑی گار ءُ بیگْواہ بوتگ ۔ بازینے ءِ دْروشم پھلواناں مٹینتگ ۔۔ بگندے سرجم ءَ اے رنگ ءَ نہ اَنت ۔ کہ مرچی مئے دیم ءَ اَنت ۔ بلئے مرچی ھمے شئیر مست ءِ نام ءَ زانگ بنت ۔ ایوک ءَ مست ناں مئے سرجمیں گیدی شئیر کسّہ ءُ داستاناں بگر تاں ملا پازل ، جام درّک ، ملّا قاسم ، مست توکلی ءُ دگہ بازینے ءِ شائری چہ پھلوان ءُ کماشاں دست کپتگ ۔۔ ھدا بہ زانت اشانی تھا چینچو کمی گیشی چہ کماش ءُ پھلوانانی نیمگا بوتگ ۔ بلئے اشاں ابید ھمے رنگ ءَ کہ مارا سر بوتگ اَنت ۔ مئے کرّا دگہ درے نیست کہ ھمے وڑا اشاں مہ منّیں ۔ ما اگاں اشاں رَد کنیں گڑا مارا مُھکم تِریں منّانکے بہ بیت ۔۔ بہ یک جمبش کلم اے چو پہ ھلو ھالو رَد کنئگ نہ بنت ۔۔ اے کار ءَ ہما مردم کت کنت ۔ کہ آئی ءَ اھدی شائری یا لبزانک ءِ سرا سرجمی ءَ دز رس بہ بیت ۔ ہرچ شائر ءِ درشانداب ءَ جوانی ءَ بہ زانت ءُ اے گپّ ءَ پہ منّانک منّینت بہ کنت ۔ اگاں ناں گڑا اے ناں تھنا گوں ہما شائر یا ساچشتکار ءَ زوراکی یے بلکیں پہ زبان ءُ لبزانک ءَ ھم سیتّ نہ اِنت

اے تاک ءَ سوشل میڈیا ءَ شنگ کنئے


« ( (Previous Post) پشتءِ نبشتانک )



Leave a Reply

Your email address will not be published. Required fields are marked *