Main Menu

مئے ھند ءُ دمگاں پسانی نام ءُ آیانی نشان – نور بشامؔ

اھدی بلوچاں گشتگ کہ
پاچن سگار ءُ مَل کپتریں
چہ نیلاں بشول ءَ گڑا سیاہ شَر تریں
سھر ءَ مہ زور کہ سھر تولگ اِنت

کپتر، مَلُّک، لیڑک، کُرُّک، شیلانچک، سیاہ کپتر، اسپیت، بَڑک، گُٹِگو، مل کپتر، گلوڑک، نیلُک، سیاہ، سیاہ مور، ٹیکّان ٹگارو، کُلو، کُلک، شنک، مَھلب، لیگار، تروشتر، گِتاچ، بُز، پاچن، تومی پاچن، چَوک، بَربری، بیلھی، سیاہ کرُک، مل کُر، اسپیت کُرّ، سگار، سگار کپتر، سگار مَلُک، بورو، مل بورُک، کُوٹّ، بنگالُک، سیاہ مل، سنگل دست ، گورگ۔

کپتر.. ھما پس ءَ گْوش اَنت کہ گوش ئِے کمے سیاہ ءُ اسپیت انت۔
مَل.. ھما پس کہ گوش ئِے کمک زردلو بہ بنت۔
لیڑُک: ھما پس کہ آئی ءِ جان ءَ اسپیتکین ءُ دْراج بُرّکیں نشان بہ بیت۔
کـرُکّ: ھما پس کہ گوش ئِے دوتل ءُ کمب بہ بنت۔
شیلانچُکّ: ھما پس کہ گوش ئِے گیش ءَ چہ گیش اسپیت بہ بنت بلے کمو سیاھی دار بہ ھم بہ بنت۔
سیاہ کپترّ .. ھما پس کہ گوش ئِے کمو اسپیت بہ بنت بلے گیشتر سیاہ۔
اسپیت: ھما پس کہ سرجم ءَ اسپیت بہ بیت۔
بڑکّ: ھما پس کہ پشت ءِ اسپیتیں لکیرے بہ بیت۔
گُٹگو: ھما پس کہ لاپ ءِ اے کش ءُ آ کشانی سربگل ءَ اسپیتیں یا گورگوئیں رنگ ءُ نشانی پر بہ بیت۔
مل کپترّ: ھما پس کہ گوش ئِے زرد ءُ اسیت بہ بنت۔
گلوڑکّ : ھما پس کہ گٹ ءِ چیر ئِے دو دراج برکیں چو لنککے وڑ ءَ ماں گُٹ ءِ چیر ئِے لونجان بہ بیت۔
نیلگ: ھما پس کہ گیشتر اسپت بہ بیت ءُ بلے سیاھی ھم جان ئِے مان بہ بیت۔
سیاہ : ھما پس کہ کامل ءُ سرجم سیاھے بہ بیت۔
سیاہ مورکّ: ھما پس کہ سیاھے بہ بیت ءُ جان ئِے گونڈکیں اسپیتیکیں ٹکے پر بہ بیت.سیاہ مور ھم گوش انت۔
ٹِکان ٹگارو: ھما پس کہ جان ئِے دراج بریں اسپتیں ٹک ءُ لکیری پر بہ بیت. ٹکان ٹگارک ھم گوش انت۔
کُلو: ھما گونڈکیں شنک کہ چہ مات ءَ پیداگ ءُ ودی بہ بیت۔
کلک: ھما کہ چہ مات ءَ بیتگ ءُ نی کلہ پہ ورد ءَ رس اِتگ۔
شنک.. ھما کہ چہ مات ءِ شیر ءَ انگت نہ سستگ بلے کمو مزن بیتگ. شنکک ھم گوش انت۔
مھلب: ھما کہ چہ مات ءِ شیر ءَ سستگ ءُ مزن انت. مَھلبک ھم گوش انت۔
لیگار: ھما پس کہ جان ءِ چپ ءُ چوٹیں لیکر پر بہ بیت. لیگارک ھم گوش انت۔
بز: مادگیں سیاہ پس۔
تروشتر: ھما نریں پس کہ دپ ءَ دو بہ بیت. تروشترک ھم گوش انت۔
گتاچ : ھما مادگیں پس کہ نوک دپ ءَ دو بہ بیت. گتاچک ھم گوش انت۔
سیاہ کُر: ھما پس کہ گوش ئِے سیاہ ءُ گومب بہ بنت بزاں دوتل. سیاھک ھم گوش انت۔
پاچن : ھما نریں پس کہ دپ ءَ شش ءُ توام دپ بہ بیت .پاچنک ھم گوش انت۔
تومی پاچن: ھما نریں پس کہ مال ھدا بند ءَ داشتگ پہ وتی پسانی زنک ءُ بر ءَ۔
چوکّ: ھما نریں پس کہ درستیں بازار ءِ پاچنانی گھلک تریں۔
کلان: ھما نریں پس کہ درستیں نریں پسانی مستریں بزاں چہ درستیں نریں پاچناں تیار تریں کلانیں ھم گوش انت۔
بَربری: ھما پس کہ گوش ئِے دراجیں بہ بنت. بر بریئک ھم گوش انت۔
بیلھی.. ھما مادگیں پس کہ سک مزن ءُ دراج بہ بیت ءُ گوش ئِے ھم مزن بہ بنت. بیلھیئک ھم گوش انت۔
مل کرُّک.. ھما پس کہ گوش ئِے کمو زرد ءُ دوتل بہ بنت۔
سیاہ کر : ھما کہ سیاھیں پس گوش ئِے سیاہ ءُ دوتل بہ بنت.مل کر ھم گوش انت۔
مل کر: ھما پس کہ گوش ئِے زرد ءُ دوتل بہ بنت. مل کرُک ھم گوش انت۔
اسپیت کر : ھما پس کہ گوش ئِے اسپیت ءُ دوتل بہ بنت. اسپیتک ھم گوش انت
سگار: ھما پس کہ کانٹانی میان ءَ اسپیت بہ بیت. سگارک ھم گوش انت۔
سگار کپتر : ھما پس کہ گوش ئِے کمو سیاہ ءُ اسپت بہ بنت ءُ کانٹانی میانی اسپیت بہ بنت.سگار کپترک ھم گوش انت۔
مل سگار: ھما پس کہ دپ ءُ لپونزاں کمو اسپیت ءُ کانٹانی میان ھم اسپیت ءُ گوش ئِے زرد بہ بنت. مل سگارک ھم گوش انت۔
بورو: ھما پس کہ دپ ءُ لپونزئِے زرد چَک بہ بنت. بورک ھم گوش انت۔۔مل بور: ھما پس کہ گوش ئِے زرد دپ ءُ لپونز ئِے ھم زرد چَک بہ بنت. مل بورک ھم گوش انت۔
کُوٹّ : ھما پس کہ کانٹ ئِے پر مہ بیت چہ مادر ءِ موجود. کُوٹک ھم گوش انت۔
سیاہ ملّ: ھما پس کہ پھک سیاہ ءُ گوش ءُ دپ ئِے زرد وڑ بہ بنت۔
سیاہ ملک ھم گوش انت۔
بنگالک : ھما پس کہ جون ءَ سک پٹک ءُ ھرد انت۔
بنگالی ھم گوش انت۔

پولکار: نوربشام

اے تاک ءَ سوشل میڈیا ءَ شنگ کنئے


« ( (Previous Post) پشتءِ نبشتانک )
((Next Post) دیمءِ نبشتانک ) »



Leave a Reply

Your email address will not be published. Required fields are marked *