Main Menu

نعیم دلپل – بلوچی زیملانی نوکیں نام (گندءُ نند)

بلوچی سوتءِ گوش دارکاں یک وڑیں سوت گوشدارگ دم برتءَ۔ گشنت کہ توار دگراں بلے سوت گشگءِ وڑءُ پیم یکیں۔ ہمے واستءَ بلوچی زیملانی گوش داروک روچ پہ روچ کم بئیگاں۔  بلے نعیم دلپل بلوچی زیملانی تہا یک جتاءُ نوکیں رنگءِ آورتءَ۔ نعیم ءِ سوتانی تہا انٹرنشنل اسٹینڈر سوت گشوکانی رنگ گندگ کئیت انت۔  نعیمءَ کوہنیں راہ نہ گپتءَ بلکیں پہ وت یک نوکیں راہءِ شوہاز کتگ، کہ اے نوکیں راہ بلوچی زیملانی تہا یک انقلاب ءِ کاریت۔  نعیم ءَ اے اوں باور کناں انتءَ کہ تو وانگءُ زانگءِ گونءَ، تو میوزک اوں دربرت کنءِ۔ نعیم گشیت کہ مشکل  مردمءِ دیمءَ کیت بلے اگاں تو المیءَ جہد بکنے تو وتی وانگ ءُ زانگ دربُرت کنءِ، ءُ وتی دگہ اِزماں اوں وت ءَ سکیت کنءِ۔

ما نعیمءِ منتءَ گریں کہ وہدی کشیتءَ او جستانی پسو داتگ انتءِ۔ ما چہ ای میلءَ جست راہ داتگ انت او نعیم پسو پّما دیم دتگاں۔ لکگءِ ردی بت کنتیں، پرچہ کہ فارمیٹنگ کمو مسلہ بیتءَ۔ اے ای میل سرءِ کتگیں گندءُ نند پہ وانوکاں ندریں۔

منتوار کہ  تو پہ ما وہد کشیت مئے وش بہتی انت تئی ما انٹرویو کنگءَ انت۔ تئی یک بلاہیں نامے۔

بلوچ پیڈیا:- درستاں چے پیسر تو وتی پجارءَ بکن کہ تو کئے؟

نعیم:– شمئے منت وارآں کہ من انچو شرپ دَئت۔ من نعیم دلپل آں۔ نعیم منی نام انت ءُ دلپل منی پتءِ نام انت۔ باز مردءَ لگ ایت کہ اےمنی پنام انت، چو نہ انت۔

بلوچ پیڈیا:تو کجا  رُستگءُ مزن بیتگءِ؟ تو کجا  چے وتی وانگءُ زانگ بندات کتءَ؟

نعیم:- من سنگانی سر تربتءَ ودی بوتگاں، ءُ ھموداں رستگ ءُ مزن بوتگاں۔ پدءَ ما آپسرءَ لڈات ءُ اتکاں۔ چوناھا مئے سیاد ءُ مردم کلانچ ءُ تیاب لمبءَ جا منند انت۔ من تربتءَ ونتگ داں بی اے کتگ۔  پدءَ من ماسٹر چہ قائداعظم شہدربرجاہ اسلام آبادءَ چہ کتگ ءُ ایم فل چہ  یو ایم ٹی لاہور کتگ۔ من زبانزانتی ونتگ۔

بلوچ پیڈیا:- تو انی چے کنگءَ اے؟ مئے متلب کہ تو وانگءُ زانگءَ دلگوشءِ یا  کہ کار  کنگءَ اے؟

نعیم:- من انوکار کنگءَ آں۔ من سی ایس ایس چکاس سوبین کتگ ءُ نو آفیسرے آں۔ بکے انگتہ مئے ٹریننگ بوگءَ انت، 2021 ءِ جنوری ءَ مئے پوسٹنگ بیت۔

بلوچ پیڈیا:- تئی دو سوت مئے دیم  ءَگوست، ترا چنچو دیریں کہ تو اے  پڑا  ایر کپتگءِ؟

نعیم:- من چہ در کسانی سوت جتگ۔ ہر کسءَ گشتگ تئی گُٹ وش انت، منءَ سکین رستگ۔ بلے تہنا وشیں گٹ الم نہ انت، وتی رنگ لوٹ ایت۔ ھمے واستہ ودار کتگ۔ سوت منی اؤلی 2019 ءَ اتکگ مردمانی دیمءَ گوں جوانیں رنگے ءَ، ھب ءُ واھگ چہ کسانی ءَ بوتگ ءُ وھدءِ گومءَ تونگر بوان بوتگ۔ من سوت جنگءَ ابید وتی سوتاں وت دھن دیاں، بلکیں ھمے واستہ اے ھب منی نہ پروشتگ۔ من گونڈویءَ چہ سوت جتگ ءُ دھن داتگ۔ آ نو گار انت، بلے منی ردوم بوتگ۔ تہنا گانا بہ جتیں بلکیں من ادءَ سرنہ بوتوں، منءَ وتی دھن دوست بنت ھمے واستہ جہد کن آں کہ ایشاں شوقیں سوت جوڈ بکن آں۔ ءُ پدءَ ایشاں بگش آں۔

بلوچ پیڈیا:- تو کجا چے موسیقی دربرتءَ؟ متلب کہ تو میوزک اکیڈمیءَ یا کہ چہ وت سکیتءَ؟

نعیم:- بد بہتی انت کہ من اے شہمیءَ در نہ برتگ ءُ ھب ءِ بنیاتءَ کار کتگ۔ پدءَ من وتی وانگءَ گوں دلگوش بوتگ آں ھمے واستہ وھد نہ رستگ کہ در بہ برآں۔ بس شوق ءِ سرءَ چیزے گوشتگ ءُ انگت دل گش ایت کہ بگش۔ من زیمرءَ علمی رنگءَ نہ زان آں، ساز منی ارواہءَ وت تچاں ءُ من گرآں راھے دیاں۔ ھمے واستہ گشگ کہ من سک اتگ، راست گوشگ نہ بیت۔ بلے من دو سال پیسر لاہورءَ بلائیں استادےءِ کرءَ دربرگءَ جہد کت، استاد بدرالزمان ءِ گورءَ کہ آئی شاستری سنگیتءِ سرءَ بیستءَ چہ گیش کتاب نبیستگ ءُ پدءَ وت بلائیں کلاسیکل گلوکارے بوتگ۔ من شر دربرگءَ ات آں۔ بلے لہتیں وھدءَ پد منی گُٹ ھراب بوت، ءُ گومءَ گپ کنگ ھم مشکل بوت، گڑا من یل دات۔ اے ھمے وھد انت کہ من ارزے کناں ءَ ریکارڑ کنگ ءَ آں۔ شش ماہ تک منی گُٹ ھراب بوت، من سک دلگران بوت آں۔ روچ ء مروچی منی گُٹ پیسرءِ وڈءَ نہ انت۔ منءَ پدءَ گانا جنگ ءِ شوق ات، گُٹ کہ ھراب بوت، گڑاں من  دربرگءَ نہ شتاں۔ بزاں من سکتگیں مردمے ءَ نہ آں، بس ھیال (ایمیجنیشن)  ءِ بنیادءَ کار کناں۔

بلوچ پیڈیا:- ترا موسیقیءِ سکگءِ واست چنچو مشکل دیمءَ اتک ءَ،  او تو چوں وتارءَ آ مشکلاں چے  چوں رکینتءَ؟

نعیم:- چو کہ وھد ءُ وسائل دوئیں نہ بوتگ کہ زیمر در بہ برآں، منی کرءَ پش کپتگیں راہ ھمے بوتگ کہ من دگراں گوش بدارآں، آھانی زندءَ بزان آں ءُ آھاں چہ دربہ برآں، چو کہ بلوچی ءِ توکءَ نورمحمد نورلءَ اؤلی سرءَ منءَ سک اثر داتگ ءُ من وتی گُٹ ھمائی وڈءَ لرزینتگ، پدءَ نمیرانیں نورخان بزنجو بوتگ۔ من اے ازمکار سک باریکیءِ سرءَ گوش داشتگ آں ءُ چاراتگ کہ اے کجا وتی توارءَ چوں کار بندانت۔ پدءَ کشورکمارءِ من سکیں مزنیں شیدایے آں۔ آئی ایکسپریشن ءَ بالی وڈ موسیقی نوکیں رنگے بخشاتگ۔ ھمے ڈولءَ من ایشانی انٹرویو گوشداشتگ آں کہ ایشاں چہ سک اتگ چو کہ کشور کمار شاستری سنگیت در نہ برتگ بلے آئی بہتءَ آئی ءَ بلاھیں موسیقار رستگ چو کہ اس ڈی برمن ءِ وڈیں ٹاکوریں زیمرکار کہ آئی ءَ کشورءِ جند ءِ رنگ آؤرت۔ ھمے شوقءَ من بلوچ گشندھانی گوستگیں انٹریو زرت آں ءُ یکجا کت آں کتابے ءِ رنگءَ، بلے کتاب باریں کجا گار بوت۔ منءَ استاد صبا ء دشتیاریءَ اے کارءَ کمک کتگ ات۔ آئیءِ توکءَ ملا کمالان بگر داں استاد ستارءِ انٹرویومان ات انت۔ منی در برگ ھمے رنگءَ بوتگ، بلے من لوٹ آں من نو شر بہ سک آں۔ مشکل ھمے بوتگ انت ءُ منی راہ ھمے بوتگ کہ گوشدار ءُ دربر، پرچا کہ استادیں مردمے نہ بوتگ کہ بگش ایت کجا نزروی است انت۔

بلوچ پیڈیا:- تئی کہ ما دو سوت گوش داشت،  دیست کہ تئی یک جتائیں رنگءِ۔ متلب کہنیں (ٹریڈنشنل) بلوچی موسیقیءَ  چے نزدیک نئیں۔ تو اے باروا چے گشے؟

نعیم:- اؤلی گپ ایش انت کہ ٹریڈیشنل موسیقی کجام انت؟ ھمے کہ انو جنگ بوگءَ انت کہ پیسرءَ گوشگ بوتگ؟ چو کہ پہلواناں گوشتگ۔ انو  بلوچی سک کم گشگ بوگءَ انت، لہتیں گاناھاں ابید، البت بلوچی ساز مان کن انت چو کہ بینجو، سروز ءُ دمبورگ ءُ دگہ لہتیں۔ منءَ زاتی رنگءَ نہ لگ ایت کہ اےبلوچی انت، بلے پدءَ گپ ھمے کئیت کہ گڑاں بلوچی کجام انت؟ اگاں کلیان یا بھیرو راگ ءِ چیزے بینجوءِ سرءَ گوشگ بہ بیت، آبلوچی جوڈ بیت؟ ھمے رنگءَ لیلا او لیلا ءَ ھر سازءِ سرءَ بجن ات، رنگ بلوچی انت۔ اے گپ ہر کسی پہمءَ نئیت ءُ اے چیز دمانءَ زانگ نہ بیت۔ من مدام رُستگیں ازمکاراں جُست کن آں کہ بلوچی ءَ تو چوں گیشین ئے کہ اے بلوچی رنگے۔ آئی مارشت بلوچی بہ بیت، آئی ٹھیکہ یا چے؟  من ھمے چیزاں دربرگءِ جہدءَ کنگ ءَ آں، باریں چنچو سوبمند باں۔ دگہ گپ ایش انت کہ منی نزءَ ھما شعر کہ ھما رنگ لوٹ ایت، بائد انت ہما رنگءَ جنگ بہ بیت، زور بلوچی ساز مان کنگ شر نہ انت۔ کوشش ھمیش انت کہ منی رنگ بلوچی ءَ چہ جتا مہ بیت۔ نوکیں تجربہءَ کنگ ھچ نہ بیت، در بران کن ئے۔

بلوچ پیڈیا:- ما گندیں کہ بلوچی  ازکارں  بس مدام یکیں راہ گپتءَ دگہ  نوکیں تام ہوار نہ کتءَ، بلے تو نوکیں تامءِ آاورتءَ، تئی ھیالاں پرچہ  پیسری گشندہاں اے راہ نہ گپتءَ؟

نعیم:- اللہ بزان چیا یکیں راھے سرءَ ازمکار جنزان انت۔ بلکیں آھاں ھمے گمان بیت کہ آھانی رنگ نوک انت۔ یا بوت کنت کہ آھاں لگ ایت کہ اے مارکیٹ ءِ لوٹ انت۔ من پہ لاپءَ گانا نہ گوش آں، منی شوق انت، ھمے واستہ منءَ اے چرت نیست کہ منی گانا محفلاں چل انت یا نا۔ مئے کرءَ ازمکاراں وتی لاپ کشگی انت ءَ لاپ محفل انت۔ پدءَ محفل ءِ لوٹ ھمیش انت کہ گانا پستءَ پُر بکن۔ ںو ہر گانا کہ پستءُ پر بکن، گڑاں نوکیں تجربہ نہ بیت۔ من ھمے واستہ تجربہ کتگ گوں دوئیں گاناھاں وتی کہ منءَ محفل ءِ پگر نیست۔ من وتی ھبءَ گانا جن آں۔ دگہ یک جیڑہ یے است کہ مردمانی ویژن ءُ سوچ سک کم انت۔ مئےھندءَ مردم کسانیں چیزےءَ گل بنت کہ بس لہتیں مردم مارا پجا کار ایت ءُ نامءَ گپت، دگہ چے لوٹ ات۔ پدءَ وانگ یک بلائیں مسلہ یے، وانندہ ئیں ازمکارے لوٹ ایت کہ مںی زیمر یا زبان ھند ءُ سیمسراں سرگوز بکن ءُ دور سر بہ بیت۔ مئے مکران ءِ گانا آوارانءَ آدیم نہ رو انت، دگہ جاگہ کجا سر بنت۔ ھمنچو کہ سوچ پْراہ ءُ شاھیگان بیت، کار ھم شرتریں درکئیت۔ مئے نیمگءَ لہتیں با سنچیں ازمکار است، بلے آ ھم سیمسرانی بندوک انت۔

بلوچ پیڈیا:- دنیااے گیشتر زبانانی موسیقیءَ ھرچ وڑیں تام استیں، دگہ زباناں چے اوں زیرگ بیتگاں ، متلب ما اگاں اردو یا ہندی میوزکءَ بچارانت آیانی تہا ترا نگلش میوزکءِ تام گند گ کیت انت، بلوچی موسیقارں بلوچی میوزکءِ تہا پرچہ دگہ تامءِ آرگ ترسیتءَ، یا نیاء  اورتءَ؟

نعیم:- بلوچی پُر انت چہ دری چیزاں۔ بس جیڑہ ایش انت شر آرگ نہ بوتگ انت۔ بلوچی چہ سندھی ءَ اثر زرتگ ءُ فارسیءَ ھم، عربی رنگ ھم گندگءَ کئیت۔ ھندی موسیقی ءَ چہ مردم وتءَ رکینت نہ کنت کہ آ مئے ھیالءَ بندوکیں پرچا کہ ما رستگیں ءُ ھمے گوش داشتگ، لہتیں ازمکار است انت کہ پکائیں بلوچی گش انت، بلے آھانی گوشداروک کم انت۔ پرچا کہ آ مارکیٹءَ بندوک نہ انت۔ دگہ یک فرقےءَ سرپد بہ بئت کہ موسیقار ءُ گشندہکارءِ توکءَ است۔ گشندہکار گانا جنت ءُ موسیقار زیمر جوڈ کنت ءُ دھن اڈ کنت۔ انوئیں دورءَ استاد علیم بلوچ است کہ بلوچ موسیقار گشگ بیت کہ کار کنگءَ انت۔ استاد دلنواز حسنی انت کہ بلائیں ازمکارے ءُ پہتائیں بلوچی کار کنت ءُ میوزک جوڈ کنت۔ استاد فرید سکیں مزنیں ازمکارے ءُ سازءَ سرپد انت، توری بلوچی بہ بیت یا شاستری۔ ایشاں جہد کتگ ءُ بلوچی ءِ نوکیں رنگ آورتگ۔ بکش ات کہ دگہ منی زہنءَ پیداک نہ انت بلوچ میوسیقار بہ بنت، پدءَ ھما گپ کہ ھمے دھناں گشندہ جت بکن انت۔ ھر کس وتی کارءَ شر بکن، وشیں رنگ دیمءَ کئیت۔ چشیں مردم سک کم انت کہ وت موسیقار بہ بیت یا دھن بدنت ءُ پدءَ وت وش بگش ایت۔

بلوچ پیڈیا:- ما گندیں کہ بلوچستانءَ چوشیں اکیڈیمی  ءِ نیست کہ  میوزک  سوج بدنت،  تئی ھیالاں پرچہ انگت میوزک ءِ دیم راوی ءِ  واست جہد نہ بیتگ؟

نعیم:- منءَ یکےءَ جست کت کہ بلوچانی کرءَ ازمکار عزت چیا نہ رس ایت۔ من پسو دات کہ کئے گش ایت کہ نہ رس ایت۔  مئے کرءَ عزت باز انت بلے کسے وتی قدرءَ وت ھم بزانت۔ اگاں عزت ءَ چہ مراد زر انت، گڑاں آ دگہ گپے۔ بلے بازیں ازمکاراں زر بے کساس رستگ، بلے وتءَ داشت نہ کتگ۔ سجیں زند وت سرءَ کس کسءَ لاپ نہ دنت۔  تئی جستءَ گوں اے گپ ھمگرنچ انت کہ اکیڈمی کئے چلائین ایت؟ ھما مردم کہ وتی جند ءِ دارگءَ بہ زانت ءُ مردماں بھیسہ بہ بیت کہ مئے گونڈو اگاں زیمر دربرگءَ روانت، گڑا زیمر دربرانت ءُ کاینت۔ اکیڈمی ءِ واستہ لازم انت کہ یک شریں ازمکارے، یک جوانیں مردمے ھم بہ بیت۔ پرچا کہ آئیءِ گورءَ نوکیں سنچ رؤت، ءُ آ ھما وڈ کنت، نوکیں ازمکار ھما ڈول بنت۔  یک شریں ازمکارےءَ واستہ شریں انسانے بوگ بلکیں الم نہ انت، بلے یک شریں استادےءِ واستہ الم انت کہ آ  ازمکارےءِ ھمراھیءَ شریں انسانے بہ بیت ءُ نودربراں سکیں بدنت۔ 

مئے چاگردءَ زیمر سک گوشدارگ بیت، بلے کس نہ لوٹ ایت آئی ءِ چک ھمے کارءَ بکن، پرچا کہ گیشتریں درور کہ مارا رس انت، آ نشہ در کپ انت۔ منی جندءَ بازیں مردماں گشتگ کہ تو آفیسرے ئے، نو گانا چیا جن ئے۔ ھا ھا ھا۔۔ بلے ازمءَ مئے مہلوک تنیگہ سرپد نہ انت۔

میوزکءِاکیڈمی ءِ واستہ لازم انت کہ یک بھیسہ جوڈ بہ بیت مردمانی توکءَ یک ءُ دومی ءِ واستہ۔ ھما کہ زر دنت ءُ ھما سوج دنت، اے دوئیں زیمرءِ شرپءَ شر بہ زان انت۔ ھشکیں اکیڈمی پچ بوگءَ وڈ نیست، ءُ دگہ گپے ایش انت کہ الم نہ انت کہ ہر کس زیمر دربارت، آ محفل بجن۔ زیمر وتی ارواہ ءِ پہازگءَ لازم انت۔

بائد ھمیش انت استاد فرید ءِ وڈیں ازمکارےءِ ازم پہازگ بہ بیت ءُ سرکار گامگیجے بہ زور ایت کہ بلوچی زیمر نوکیں دورءِ ھمراھیءَ اتک بکن، شریں رنگےءَ۔

بلوچ پیڈیا:- بلوچی گوشداروک مرچاں گیشتر اردو /ہندی موسیقی گوشدارنت، مردم گشنت کہ پمشکہ کہ بلوچی میوزک بس یکیں رنگءِ یا کہ تامءِ، تو چی گشے اے بابتءَ؟

نعیم:- اے راست انت۔ من وت سْیاہ دل بوتگ آں کہ بلوچی ءِ ہر گاناءِ  چاڑ یکین انت، توری شادہ بہ بیت یا ملوری ءِ۔ مئے کرءَ من چاراتگ لہتیں زبردستیں شعر ءُ دھن گوشگ بوتگ، بلے میوزک ءَ مرچی ئیں تب گپت نہ کتگ۔میوزک ارینجمنٹ ءِ مئے نیمگءَ بلائیں جیڑہ است کہ کجام ساز کجام جاہءَ بئت ءُ چنچو وھدءَ بئیت۔  بلوچی سازانی ھواریءَ کجام دری ساز اے مارشتءَ سرجم کُت کنت۔ اےھچ نیست مرچی ئیں بلوچی زیمرءِ توکءَ۔ مارشت بزاں کہ فیلینگ ھچ نیست۔ زیمرءَ اگاں کسے ءِ جزباتاںی عکاسی نہ کُت، آ گوشدارگ نہ بیت، توری ھر وڈیں بلاھیں ازمکارے جوڈے بکن۔ باھد انت ہر ساز یک کسہ یے بگش ایت ءُ ھر ساز ھما تبءَ کار بندگ بہ بیت۔ مئے کرءَ زبردستی کنگ بیت سازانی گومءَ، ھمے واستہ منءَ لگیت مردم ھمگرنچ بوت نہ کنت ءُ پہ وتءَ دگہ رایے شوھاز آں۔ ھندی نہ، بالی وڈ گوش دارآں مئے کرءَ مردم، ءُ بالی وڈ سرجمءَ مارشت ءِ نام انت۔ ھر چیز گوشدارانت آھانی مرضی انت، بلے بلوچ ازمکار بائد انت ھمنچو کار بکن انت کہ بلوچ ءِ نوکیں پدریچ ءِ ہر تبکہ بلوچی گوش بہ دار ایت ءُ پہر بہ بند ایت، بلوچ ءِ کرءَ زیمرءَ چہ مستریں رنگ انو نیست کہ دنیا ءَ بدنت یے۔

بلوچ پیڈیا:- نوکیں تام یا  کہ موسیقی  ءِآدگہ رنگانی ھوار کنگءِ واست چے کنگ لوٹیت؟

نعیم:- کار کنگ لوٹ ایت۔ ھما کہ زیمرءَ سرپد انت۔ بلوچی زیمرءَ ھم سرپد انت ءُ شاستری یا دنیا دگہ زیمرءَ، باھد انت انچیں دھن جوڈ بکن انت کہ بلوچی ھم زاہر بہ بیت ءُ رنگ ھم نوک بہ بیت۔ اے کارءَ نصیب مزار، استاد فرید، استاد علیم ءُ استاد حسنی کُت کن انت، باھد انت بکن انت۔ من لوٹ آں ھمیشانی لہتیں چیز بگش آں پرچا کہ اے زیمر ءِ زبانءَ سرپد انت، ءُ من وتی مارشتءَ کار بند آں وھدے گانا یے دھن دیاں، منی دھن بلوچی ءَ چی سک جتا ھم بوت کن انت، ھمے واستہ منی واھگ انت کہ اے استادانی لہتیں چیزے بگشاں گوں نوکیں رنگے ءَ۔

بلوچ پیڈیا:- بازیں گوش داروک گشنت کہ تئی زیملانی تہا “گٹّار” ھوار انت، بلے ما سرپد بئیں کہ گٹار یک انٹرنشنل سازءِ، کسّی ءِ میراث نئیں، تو چے گشے اے بابتءَ؟

نعیم:- گٹاربائدانت کہ جیڑہ یے مہ بیت، بلے مردم وتی گپاں جن انت۔ من پیسرءَ گشتگ ات کہ تجربہ کنگءَ چے بیت۔ زیمرءِ وتی دنیا یے، ھودءَ ہر سازءَ رنگے است۔ اے سازانی گناہ نہ انت کہ یک جاہ یے ءِ نامءَگوں بندوک انت۔ اگاں سروز دگرانی زیمرءَ کارمرزبکن ئے، گڑاں مردم ھمے ڈول گش انت؟ بچار آ مردماں کار کتگ ءُ وتی ساز منارینتگ انت ءَ ما جہد بکن ایں کہ کمو وتی سازانی رنگءَ مٹ بکن ایں۔ دمبورگ ءُ سروز ءُ دونلی ءُ دگہ بازیں ازباب یونیک انت دنیاءِ زیمرءِ توکءَ۔ منی دل سک گش ایت کہ من ھمیشانی گومءَ نوکیں کار بکن آں، بلے من پہ لاپءَ وتی بندرءَ چہ دورآں، ھمے واستہ مجبور باں کہ گٹار مان بکن آں وتی سوتانی توکءَ، بلے منءَ گوں گٹارءَ ھچ مسلئہ نیست، دمبورگ ءَ گٹار یکجاہ بہ لگ انت، منءَ گمان بیت کہ سک وش بیت۔ ءُ من یک گانا یے جیڑاتگ کہ گوں بلوچی ءُ دری سازاں گْوپگ بیت۔

بلوچ پیڈیا:- یک گشندہءِ واست ءَ ساز ءُ زیملانی سرپد بئیگ ، زانگ ، سِکگ یا کارمرز کنگ چنچو المی انت؟

نعیم:- سک الم انت۔ ہر اسسانے کہ ہر کار کنت، ھما ازبابانی بابتءَ شریں سرپدی یے بہ دار ایت کہ چو کار کن انت۔ الم نہ انت ہر ساز ءِ جنگ بزانت بلے ہر سازءِ تبءَ سرپد بہ بیت۔ گشندہ ءِ گیشتریں زور آئیءِ گشندئی ءِ سرءَ بہ بیت۔ ھمے وڈءَ یک سازندہ یے وتی سازءِ سرءَ کار بکن۔

بلوچ پیڈیا:- باز ہمے گشنتیں کہ  اگاں یک گشندہءِ سکیت موسیقی،    آ گار نہ بیت، بلے اگاں یکی ءِ ایوک گُٹّ وشیں آ یک دو نوار ءَ  پد بے گواہ بیتیں یا کہ گوش داروک نبیتءِ، تو اے باروا چے گشےکہ   یک گشندہیءِ واستءَ  چی گیشتر زلوری انت، گُٹّءِ وش بیگ یا کہ استادانی کرءِ موسیقی ءُ  زیملانی سکگ ءُ در برگ؟

نعیم:- ہرازم ءُکارءِ دربرگ شر انت۔ پرچا کہ یک شریں استادے ترا تئی نزوریاں گشت کنت ءُ مردم دمانءَ وتی نزوریاں گہتر کت کنت۔ وت دربرگ گران انت، بازیں رنداں مردم تاوانءَ ھم رؤت گوں نزانتکاریءَ۔ بلے وت دربرگءِ یک رنگے ایش انت کہ مردم نوکیں تجربہ کت کنت ءُ دودانی بندیگ نہ بیت ءُ عہد سازایت، بلے ایشیءِ توکءَ ترس ھمیش انت کہ مردم گیش زیاں بوت کنت۔ گُٹ وش بوگ دادے اگاں کسےءَ چہ ودی بوگءَ گون انت،آئیءَ وتی گُٹءِ سرءَ گیش محنت کنگی نہ بیت ءُ آ زیمرءِ دگہ رنگاں دربران کت کنت۔ زندگ بوگءِ واستہ دربرگ الم انت۔ ہر ازمکارے بائد انت ہر دمانءَ دربرگءَ بہ بیت۔

بلوچ پیڈیا:- گشنت کہ یک زبانی زند گ دارگءِ ھاتر میوزک یک بلاہیں  کردارءِ، تئی  ھیال چیاں اے باروءَ؟

نعیم:- میوزک ءِ وتی زبان است ءُ ہر میوزکءِ وتی گالوارے، بلے وشیں گپ ایش انت کہ زیمرءِ گوشداروکءَ اے سجیں گالواراں دوست داراں۔ بلے زبان چو نہ انت، ھر کس دومی ءِ گپانی سرءَ کند ایت ءُ زہر انت کہ اسل منی انت۔  ھمے واستہ وتی زبانءَ دومیءَ را شریں وڈےءَ سر کنگ ءِ واستہ زیمر الم انت۔ منءَ چنچو مردماں گشتگ کہ تئی گاناھانی وجہءَ ما بلوچی گوشدارگءَ انت، پمن اے بلائیں دادے۔ پدءَ بلوچستانءِ گیشتریں دمگاں سر بوتگ، متلب بلوچی سر بوتگ۔ وھدے زیمر شر جوڈ کنگ بیت،آئی شعر شر زورگ بیت، آ سوت نامدار بیت کلیں دنیا ءَ، بزاں تئی زبان نامدار بیت کہ ھر کس جست کنت اےکجام زبانءَ انت۔ دگہ گپاں بل، مئے پدریچءَ را نورخان بزنجوءَ ءُ عارف بلوچ ءَ یک عمرےءِ شاعری وتی زیمرءِ توکءَ سوج داتگ۔ آئی شعرانی گچیین ستا کرزایت کہ وتی دورءَ بسٹ زرتگ۔ کوھنیں زیمراں گوشدارات ءُ زان ات کہ آ وھدءِ شاعری داب چون بوتگ۔

بلوچ پیڈیا:- سوت گشگ  مئے بلوچی چاگرد یک روزگارءِ نہ انت، گشندہ شریءَ وتی لوگ  ءَلاپ دات نہ کنت،  ہمے سبب انت مردم گیشتر میوزک ءَ  ہُب نہ انت، تئی ھیالاں چے پیمیں جہد لوٹییت کہ موسیقی یک روزگار بے بیت، دانکہ گشندہءِ سوت  جنگ آئی ءِ روزگارءِ سبب  بے بیت؟

نعیم:- اے سکیں گرانیں جستے پرچا کہ ایشیءِ سدکیں پسومنی گورءَ نیست۔ ازم ءُ روزگار دو جتائیں چیزانت، ازم وتی اندری درشان انت ءُ جندءِ ارواہ ءِ گیگ کنگ انت۔ بلے وھد ءِ ھمراھیءَ اے روزگار جوڈ بوتگ۔ ءُ زبردست انت کہ کسے زر کمائین ایت چہ وتی ازمءَ، بلے برے یکے کہ سک زانتکارانت پہ گژن بزگ بیت ءُ کسے کہ کم زانتکار انت، باز کمائین ایت ءُ زندآسودگ بیت۔ بلے مئے کرءَ مسلئہ ایش انت کہ ہر کس وتی دوران انت، آ گش ایت زند ھمیش انت بس، دیمءَ ھچ نیست، ھمے واستہ زرزوال بیت۔ سک کم مردم نامداریءِ ملاراں وتءَ داشت کنت۔ من گش آں بلے منی جند دانکے الم نہ انت کسے تپاک بہ کن کہ ازم بزاں موسیقی پہ لاپ مہ بیت۔ لاپ ءِ جیڑہ دگہ نیمگے پٹگی انت ءُ پرچا کہ مارا چشیں انڈسٹری یے نیست کہ زر بہ رس ایت۔ یک کارے ایش انت کہ سجیں ازمکار یکجاہ بہ بنت ءُ گلے اڈ بدینت کہ آھانی البم شنگ بوگءَ پیسر سکرینگ بہ بنت چو کہ تامر بنت ءُ ٹکٹ ایر بکن انت۔ بلے اے ھما وھدءَ بیت کہ ویڈیو جوڈ بہ بیت۔ اے گپ انو ھر کس ھش بکن منی سرءَ کند ایت کہ چشیں چیز مئے کرءَ نہ چل ایت، بلے اگاں زندگ بوگ لوٹ ات، تجربہ کنگی انت۔ اے وڑیءَ شریں کار ھم دیمءَ اتک کنت کہ تپاسگ بنت۔ منی جند ءِ دوئیں گانا من وت گوں وتی پگارءَ جوڈ کتگاں ءُ منءَ ایشانی کلدارے ھم واپس نہ رستگ۔ منی بس شیدائی انت۔ بلے منءَ روزگارے است کہ من چم چست کتگ آں ءُ چار اتگ کہ سجہ ئیں ازمکار ھمے زنگءَ جن انت۔ ھمے واستہ من گشت لاپ ءِ جیڑہ ءَ ٹاھین آں، پدءَ کار کن آں۔

بلوچ پیڈیا:- تو وتءَ کجا گندے بلوچی موسیقیءِ پڑءَ؟

نعیم:- من سکیں کسانیں ازمکارے وتءَ لیک آں بلوچی موسیقی ءِ پڑءَ پرچا کہ من شوقءِ بنیادءَ کار کن آں۔ من توار بوت کن پہتائیں بلوچی توارے نہ انت، ھمے واستہ منی دروشم مٹ بیت۔ علمی بنیادءَ کار کنگی انت۔ ءُ شریءَ دربرتگیں مردمے اے کارءَ کُت کنت۔ بلے من دربرگءِ ھب ءُ واھگ است، منی گومءَ ہر رنگءَ کارے بوت کنت، من کن آں۔ استادے ءِ ھمراداری گون بیت، زبردست انت۔ اگاں نہ بیت ھم، من جنزگ یل نہ کن آں۔ منی دل گش ایت کہ بلوچی زیمر انچیں رنگےءَ دیمءَ آرگ بہ بیت کہ دگہ دنیا مارا چہ دربہ بارت۔

بلوچ پیڈیا:- ترءَ البم جوڑ کنگءِ ارادہ  است انت؟

نعیم:- جی ھؤ، ارادہ است انت۔ پرچا کہ البم لازم انت، البم ءِ توکءَ یکپاری ءَ باز تجربہ بوت کنت۔ بازیں تھر مردم دیمءَ آؤرت کنت۔ من یک یک سوتے ھمے واستہ شنگ کن آں کہ انو کمیں نہ گیگ آں، پدءَ من لوٹ آں سوتانی عکسبندی ھم وش بہ بنت، ھمے واستہ منی البم وھد جنت، بلے روچے الم کن آں۔

بلوچ پیڈیا:- ھما نوجوان کہ موسیقیءِ پڑا آہگ لوٹ انت، تو آیانءَ چے سوج ءُ  سلاہ دئیگ لوٹءِ؟

نعیم:- سوج ھمیش انت کہ مہ گَل ات۔ گَلگ شریں کارے نہ انت۔ ہر شریں کار وھد جنت۔ منی اگاں سوتے سوبمند بوتگ، اے منی سجیں زندءِ جہد انت۔ من داں سر چست کتگ، گانا جنگءَ آں۔وتءَ چہ زی ءَ شرتر کنگءِ جہدءَ کنگءَ آں۔ دیمءَ نہ یتکگ آں ھمے واستہ کہ منءَ وش نہ بوتگ ءُ وسائل نہ بوتگ شریں کارءِ کنگءِ۔ پیسرءَ من ءَ لاپ ءِ مسلئہ گیشینگی ات ءُ پدءَ  وتی شوق۔ وشیں گٹ یا شوق بوگ تہنا کار نہ دنت، وتی توار پٹگ الم انت کہ تو آکجام چیزءَ آرگءَ ئے کہ ترا چہ پیش کسءَ نہ کتگ۔ من سدک آں عزت ءُ زر دوئیں رس ایت۔ کسے اگاں سرجمءَ زیمرءِ پڑءَ آیگ لوٹ ایت، آ جوانیں رنگےءَ در ببارت ءُ بینڈ جوڈ بکن کہ بلوچانی توکءَ بینڈ چشیں انو منءَ گندگءَ نئیت کہ بلوچی زیمرءِ پیش بہ دار ایت۔ کار باز انت پہ کنگءَ، بلے جہد ءُ محنت لوٹ ایت۔ وانگ لازم انت۔ ہر رنگءَ ونت کن ئے، بوان ات کہ بلوچی زیمرءَ علمی رنگءَ بیان کت بکن ات۔ وتی رنگءَ پٹ ات ءُ آئی ءِ سرءَ کار کن ات بجاء ایشی کہ ہر فن مولا بہ بئت۔

بلوچ پیڈیا:- بلوچی زبانءِ زندگ کنگءِ واستءَ چے کنگ لوٹ ات؟

نعیم:- بلوچی زبان است انت ءُ زندگ انت۔ مارا بلوچی ءِ ہر گالوار زانگی انت ءُ آھانی ازمکار وانگی انت۔ بد بہتی انت کہ سرجمیں بلوچستاں بہر انت۔ ما علاقہانی بندیگ ایں۔ سلیمانی وتءَ گوں مشکول انت، رخشانی نیمگے ءُ مئے مکرانءَ ھمے دْروشم انت۔ ما سک کم دگراں وان ایں ءُ ھمے رنگءَ مئے شاعر ءُ ازمکارآ دمگاں گوشدارگ نہ بنت ابید چہ لہتیں مردماں۔ دنیا نز آیان انت ءُ ما چہ وتءَ دور ایں۔ من یک زبانزانتیءِ نودربرےءِ رنگءَ اے گپءَ دلجمی گش آں کہ بلوچیءَ ھچ نہ بیت، ھشکیں کوکار ءُ جاکہ ھچ نہ رس ایت، بس الم ھمیش انت کہ بلوچی ءِ توکءَ نوکیں تجربہ کنگءَ مردم مہ ترس انت توری آ ہر پڑءَ بہ بیت۔ ءُ بلوچ ءِ چک بلوچی بوان ایت ءُ بلوچ ءِ نبشتکار انچیں کار بکن انت کہ مہلوک بلوچی ءِ وانگءَ مجبور بہ بیت۔ زیمر ھم ھمے ڈول بہ بیت۔

بلوچ پیڈیا:- تو امنچو دیم راوی کنءِ تئی دوست داروک باز بنتیں او لہتے ندکار اوں بتیں، ترا گوش داروکانی ندکاری یا تنکید دلپروش کن ات، یا کہ تو ندکارانی ھبراں پہ سلاہ زیرءِ گیشتر جہد کنے؟

نعیم:- مئے کرءَ شہمیں ندکار یا تو بگش ایراد گروک زیمرءِ پڑءَ نیست۔ ہر کسءَ دست ءُ دپے پر انت، آ وتی گپاں جنت۔ من دلپروش نباں، بلے منءَ لہتیں مردمانی سرءَ الم کندگ کئیت وھدے گش انت تئی سُرادءَ چوٹ انت ءُ ایش ءُ آ۔ منءَ گمان بیت کہ درست خان صاحب انت۔ لہتیں برءَ شوکیں گپ جن انت بلے گیش پتاری انت، پتاری من دلءَ نیارآں۔ بازیں برءَ من وت زان آں کہ چیزے من گشتگ نزوری مان انت بلے آوھدءَ گشگ بوتگ، نو مردم کشگی وَ نہ انت۔ منی گومءَ دگہ مسلئہ یے کہ من شعراں بے ھال کن آں، اے منی مزنیں نزوری یے، ایشیءِ سرءَ من کار کنگءَ آں۔

بلوچ پیڈیا:- جہانءِ ہمک دمگءَ ورنہ وتی وانگءُ زانگءِ ھمراہیءَ دگہ اوں ہب دارنت، متلب کہ سازءُ زیمل، ناچ، پنٹنگ، عکس کشی، لئیبءُ گوازی،  او دگہ، مئے راج پرچہ ہمے سرپد بیتیں کہ اگاں وانے گڈا دگہ ھچ مکن یا کت نہ کنے، بلے تو  وت یک زندگیں مثالیءِ،  تئی ھیال چیاں اے باروءَ؟

نعیم:- بچار، دنیاءَ کل یک ھساب نہ بنت۔ مئے کرءَ کسے کہ ھبے دارایت گڑاں وانگءَ چہ چٹ دور بیت۔ وتی سجیں وھدءَ زوال کنت ءُ رندءَ پشومان بیت کہ من اے کار چیا کُت یا زیملءِ پڑءَ چیا اتک آں۔ جیڑہ ایش کہ مئے نیمگءَ ھب سک مردماں لاپ  نہ دنت، ھب پہ ھب بیت نیکہ لاپ، گڑاں مردم دربارت۔ من نہ گش آں اے شرانت، بلے ھمے وڈ انت۔ اگاں من تہنا زیمرڈ بہ کتیں، بلکیں من شرتر کار کتگ ات یا بلکیں من ھچ کار نہ کتگ ات ءُ سجیں روچ چرت جتگ ات کہ شپءِ شام چون رس ایت۔ پدءَ تہنا لاپ نہ انت، زمانگءِ درد دگہ باز انت۔ من ڈنی ملکاں نہ شتگ آں کہ ھودءَ ازمکار چون انت، بلے اے گپ سدکی گشگ بیت کہ ہر کس وتی ہب یا ازمءِ پشتءَ لاپ نہ ورگءَ انت۔ چندیں مردم گیش سوبیں بیت چاگردی رنگءَ ءُ چند پش کپ ایت۔ بلے بلوچ ءِ چک وتی لاپءَ دگہ نیمگے شوہاز بکن، وگرنہ ھمے ازمءَ زاہ دنت کہ منءَ ھچے نہ دات۔ الم نہ انت کہ ہر کس منی وڈءَ بہ جیڑایت۔ لہتینانی واستہءَ من مزنیں زہمے جتگ کہ دو سوب کتگ ءُ لہتیں گش ایت یک کارے پہ شری بکن۔ گپ باز بیت، ہر کس وتی راہءَ وت شوہاز بکن۔ پدءَ مئے چاگردءِ تب چوش پراہ ءُ شاھیگان نہ انت تنیگہ کہ وتی گْونڈوہاں چواجازت بدنت۔

بلوچ پیڈیا:- تو ھما ماتءُ پتاں چے گشگ لوٹے   کہ وتی چکاں وانگءَ ابید دگہ ھچ شوک دارگءِ نئیل انت؟

نعیم:- شوک دارگ الم انت۔ پدءَ مئے کرءَ گیشتریں پت کہ است انت آ شوق ءِ پیلو کنگءَ بے سوب انت۔ بزاں کہ ناکامیاتی انت۔ مئے پتاں ھم جہد کتگ کہ وتی ھباں سرجم بکنیں، بلے نہ بوتگ انت، ھمے واستہ آ وتی چکانی سرءَ ھم ستک نہ کن انت۔ پدءَ چک ھم ھمے چاگردءِ پیداوار انت، مدام ماتءُ پتاں دلگران کن انت گوں وتی گنوکیاں۔ ماتاناں مئے کرءَ گپ نیست ھمے واستہ میاریگ نہ انت۔ من مات ءُ پتاں نہ، انوگیں چکاں گشگ لوٹیں کہ دنیا پچ انت، وتی زندءَ وتی بے سریانی بندیگ مہ کن انت۔ ڈنءَ درءَ ات، بوان ات، گپ جنگ در بہ برات،ازمءَ دیمءَ بہ بر ات ءَ انچیں مات ءُ پت جوڈ بہ بئت کہ آھانی کرءَ وتی چکاناں پہ دیگءَ ترس مہ بیت، سکین بہ بیت۔

بلوچ پیڈیا:- ترا وتی کجام سوت گیشتر وش بیتیں، “ارزءِ کناں” یا کہ “لقاہ”؟

نعیم:- منءَ دوئینانی دھن دوست انت۔ لقاءِ زیمرانگت وشتر بوت کنت۔ من روچے وتی ورژنءَ جوڈ کن آں وتی سوتانی، ھمے واستہ انو لہتیں نزوری ڈلگ چار کن آں کہ وسائلءِ کمی انت۔

بلوچ پیڈیا:- بد کسمتیءَ چے مئے چاگردءَ   انگت سوت گشوکاں گوں شریں چمیءَ  نہ  چارانت، تئی گس ءَ شکایت نہ اتکگءَ کہ شمئے چک سوت گشیت؟  چے پیمءَ تئی لوگءِ مردماں یا  کہ تئی کشءُ کرءِ مردماں تئی دل بڈی  کتگ؟

نعیم:- دیمءَ کس ھچ نہ گش ایت۔ پشتءَ مردم گپ مجن انت، زندگ بوت نہ کن انت۔ لوگ ءِ مردم گل انت کہ چک نام انت ءُ شریں گانا یے جتگ۔ پدءَ من ھودءَ نہ بوتگ آں 2011 ءَ پد، ءُ ہر کسءَ کہ منی گومءَ گپ کتگ دلبڈی داتگ۔ منی بس لوگ والاھاں ھمے چیز دوست نہ بیت کہ تئی سرءَ زرشان بہ بیت چو کہ محفلاں بیت ءُ منءَ وت ھم وش نہ بیت انچو پہ دیمیں دیوان۔ اللہ ءِ شکر انت منءَ روزگارے است، ھمے واستہ منءَ ضرورت نہ انت، بلے اگاں سنجیدہ ئیں   دیوان بہ بیت، من الم وتی ازمءَ پیش دار آں۔ چپورتی منءَ دوست نہ بیت ءُ اولی روچءَ چہ دوست نہ بیت۔ ازمکارے کہ چیزے گش ایت، آ گوں جوانیں رنگےءَ گوشدارگ بہ بیت۔

بلوچ پیڈیا:- گُڈّیءَ تو وتی کلیں گوش داروکاں چے گشگ  لوٹے؟

نعیم:- شمئے مہر ءُ دوستی منءَ ہر دمان سکین دینت۔ من زان آں منءَ چہ شما باز امیت دار ات، بس ھمے گش آں کہ من انسانے آں۔ باز رندءَ دلکشیں چیز کہ سجہاں دوست بہ بیت گشت نہ کن آں۔ ءُ من تجربہ کنگ لوٹ آں گوں وتی آواز ءُ دھناں، ھمے واستہ آسر ھر چیز بوت کنت، وش ھم بیت ءُ ھراب ھم، بلے وشتر ھم بوت کنت۔ پدءَ منءَ زیمر ہر جا بہ رس ایت، توری آواز منی ساپ انت یا کلگءَ گپتگ یا ویڈیو شر انت یا نا، کوہ ءُ دمگے یا شوکیں کمرہ یے، منی دل کہ لوٹ ایت، من گانا جن آں۔ بازکس منءَ گش ایت چو مکن کہ ترا اسٹینڈرے است، منی دلءَ زیملءَ چہ مستریں اسٹینڈر بوت نہ کنت۔ من ہپلوڈ ھمے واستہ کن آں وتی اے دیوانی گاناہاں کہ لہتیں گوشداروک لوٹ ایت اے رنگءِ چیز۔ ءُ من امیت کن آں کہ شمئے سرءُ سوج ءُ منی سرءَ انچو ساھیل بنت، من باز کار کن آں۔ کل سلامت بات ات۔

اے تاک ءَ سوشل میڈیا ءَ شنگ کنئے


((Next Post) دیمءِ نبشتانک ) »



Leave a Reply

Your email address will not be published. Required fields are marked *