Main Menu

مبارک قاضی

اگاں شمے کرءَ واجہ مبارک قاضیءِ شئر استیں گڈا المیا پما راھ بدیتءِ، مئے تاکءِ تہا جاگہ داینے۔

info@balochpedia.com

درست بنت راست ءُ رداں

درست بنت راست ءُ رداں گَندگ ءُ شر الّمی اِنت
هو پہ زندگ بوهگ ءَ رپک ءُ هنر المی اِنت

انچیں جاه یے من برگ لوٹاں ترا روچ نہ شپ
انچیں جاه یے کہ مہ بیت هشک نہ تر المی انت

تو اگاں لوٹ ئے چہ آس ءَ وتا پهریز کن ئے
برپ مانپوش زمستان ءَ چکر المی اِنت

تو کہ لُنٹاں وتی هینّاریں گوں مزواکاں گس ئے
پہ تئی تریاکیں لباں شَهد ءُ شکر المی اِنت

هو اگاں درد تو کازی دل ءَ هنکین کتگ
شنک ءُ هیرات بہ بنت جان ءُ جگر المی اِنت

بینگ بام چہ رکاں

بینگ بام چہ رکّاں چماں آس شراب
اُو مهرانی نگره تلاهیں تاس شراب

تئی ٹهلانی تیراں گوں زیمیں زِرد ءَ
من چکّاساں، تو جگر ءَ چکّاس شراب

داں هشر ءَ تئی نام کتاباں پشت کپیت
نوش بکن مئے پیما چاریں پاس شراب

گل ماں گلیں پوشاکاں انچو ڈولدار اِنت
چو کہ بہ بیت ماں کانچ ءِ کٹور ءَ لاس شراب

مئے بازار ءَ زهریں آپ ءِ تنگی نیست
مئے پیریناں بهر کتگ میراس شراب

پہ هونیگاں بیر ءِ سکین ءَ رودین اِیت
وهد ءِ مزاریں دست ءِ زهیں الماس شراب

کازی ، دوست ءِ توسیپ ءَ من چی بگشاں
چو آبریشم دیم، بدن کرپاس شراب

دمکاں مسکیں وشبوئے

دمکاں مسکیں وشبوئے نیمون کتگ
پلے پیتکگ توں گوں سمینءَ گون کتگ

عمرءِ شنگزءَ سپتے پینگ گواہ نکنت
تئی دوریءَ بشءِ آمین پون کتگ

تو کہ گشتگ ترمپے ھون منا کار انت
من داں سر داں پاد وتارا ھون کتگ

اے امروزءَ کسءَ را قیامت نکتگ
من وتی جندءِ بڈءَ جندءِ جون کتگ

اے بیلگ دھکان ترارا موکگی انت
تو چہ رونءَ پیش ڈگارے رون کتگ

قاضی فرشتہ قبرءِ تھا کہ جست کننت
وت من نزاناں امروزءَ من چون کتگ

زرکؤشے دیدگاں

زرکؤشے دیدگاں گوں بدارے کدی مرے
اے زندگی نبوتگیں کارے کدی مرے

دزی کنۓ، نماز کنۓ، مرگ لازم انت
زھرے ورے کہ لنش و پتارے کدی مرے

یک ستکگیں ڈگارے بچارۓ دلءِتبءَ
امروز ھشکیں دنز و گبارے کدی مرے

دانائیں مرد ستک بزاں وت وتا کشیت
یک ساعتے، دمانے، گدارے، کدی مرے

نا مھرمیں جھان گوں جندءَ درآمد انت
پر مھریں دیدگاں گوں بچارے کدی مرے

کایاں چو یک مساپرے قبرءِسرا تئی
گوں من بکن تو قول و قرارے کدی مرے

قاضی من ھر کجا کہ رواں زند شاھد انت
گوشاں منی کپیت توارے کدی مرے

وت ءَ ندیستہ

وت ءَ ندیستہ پہ آپے سر اِنت کہ آدینکے
نزاناں وھد منی درور انت کہ آدینکے

من ءَ ابید پُراں ھچ دِگہ نئیت گندگ
اے زیبداریں ھما بندر انت کہ آدینکے

گناھے نہ کہ دگے سلیں ھرکتے کتگ ئے
دل اِنت کہ بیرگ ءَ آس ءُ چر انت کہ آدینکے

ے گم کہ تو من ءَ داتگ مدام آمین انت
اے‌ دْرچک بے سمر ءَ چُش بر انت کہ آدینکے

کسے بگند چو براھیم ءَ سر داں پاد بن انت
بچار کازی بتے آذر انت کہ آدینکے

مھپرانی ایر گواتءَ

مھپرانی ایر گواتءَ مسک و مہلباں کشتہ
مارا ماہءِ درور تئ بینگیں لباں کشتہ

ھرکسی وتی بالیں چو مسال مرگانی
باز پہ لنکہے زندگ باز پہ متلباں کشتہ

زندگی ھما چرک انت چار وارت اناگہء
یک سلامتیں مردے شانءُ دب دباں کشتہ

قاضیءَ را ھچ جاگہ ایمنی نسیبءَ نیست
روچے شگربءَ کشتہ روچے مگربءَ کشتہ

دیدگ ارساں

دیدگ ارساں دل آسرداں زرت نہ کنت
مهر ءِ کیسگ لُکّ اِنت درداں زرت نہ کنت

جاگہ دنت کاچاک ءُ شپکاں چم ءِ تہ ءَ
چونیں تیابے دریا ورداں زرت نہ کنت

بل ننگار ءَ بڈّ ءَ کنت تئی پیریں پت
تئی ورنائیں کوپگ برداں زرت نہ کنت

بس تئی ترانگ امروز ءَ مئے میراس انت
دل بیچارگ گرماں سرداں زرت نہ کنت

دھر ءِ گماں انچش کازی ایرجیگ کتگ
واھگ ءِ گرانیں بارءَ مرداں زرت نہ کنت

کل تکانسر مَدگ ءُ مور

کل تکانسر مَدگ ءُ مور ءِ سلیمان کُج انت
ترانگءِ تہتءِ روان شاھءِ پریان کُج انت

ادءَ کُل ششتگءُ ساپ انت گوں بہشتءِ آپءَ
من وءَ دمبرتگاں درگیجگءَ شیطان کج انت

انشپی تو کہ نیاتکئے پہ گدارے ڈنّءَ
ماہ چو بانورءَ پراتکگ بلے مہکان کج انت

واھگءِ شہرءِ طبیباں چے کسے جست بکنت
آس پرداشتگیں دردءِ منی درمان کج انت

تو ماں تیر بستگیں اولاکاں سوارئے گردے
سر کماش مُلکءِ منی لوگءِ نگہبان کج انت

مردمے نیست کہ تئی لوگءِ پُراں آپ بہ جنت
قاضیءِ میّت تو گلگدارے مسلمان کج انت

گمانی تاکءُ دپتراں

گمانی تاکءُ دپتراں شمار روت برے برے
گوں کهرمانیں جیڑگاں کرار روت برے برے

آ مهربانیں مالکءِ وتی کمالءُ قدرت انت
داں عرشءَ بے توارےءِ توار روت برے برے

بہ تنگ هرچی دل گُشیت بنوش داں تئی وس رسیت
شرابءِ گیچلاں مہ کپ خمار روت برےبرے

نزانت راهءِ مُشکلاں نہ چاریت کوهءُ جنگلاں
پہ دیرءُ دارجیں منزلاں سوار روت برے برے

من چے کناں کہ گوں منا نہ سیلیت قاضی هچّ وڑا
بگر اے کودکیں دلءَ بدار روت برے برے

چراگے ماں بدار اِت

چراگے ماں بدار اِت آس ءِ نام ءَ
شپ ءِ درداں بِہ مار اِت آس ءِ نام ءَ

بگندئے آپ بنت کلمانٹیں دریا
زِری نوداں بِہ گْوار اِت آس ءِ نام ءَ

زمین ماتے گوں زہگاں بُنگران اِنت
وتی دستاں شہار اِت آس ءِ نام ءَ

اے دل آساپءِ چَکّاس ءَ گْوزان اِنت
وتا گوں آس بِیار اِت آس ءِ نام ءَ

من تْرمپے آپ نوشاں بیار قاضی
شُما گالاں کتار اِت آس ءِ نام ءَ

وتا ندیستہ پہ آپے سر اِنت

وتا ندیستہ پہ آپے سر اِنت کہ آدینکے
نزاناں وھد منی درور انت کہ آدینکے

من ءَ ابید پُراں ھچ دِگہ نئیت گندگ
اے زیبداریں ھما بندر انت کہ آدینکے

گناھے نہ کہ دگے سلیں ھرکتے کتگ ئے
دل اِنت کہ بیرگ ءَ آس ءُ چر انت کہ آدینکے

اے گم کہ تو من ءَ داتگ مدام آمین انت
اے‌ دْرچک بے سمر ءَ چُش بر انت کہ آدینکے

کسے بگند چو براھیم ءَ سر داں پاد بن انت
بچار کازی بتے آذر انت کہ آدینکے

ھچ دگہ مال ءُ متاہ سر پہ سر ءَ

ھچ دگہ مال ءُ متاہ سر پہ سر ءَ زرت نہ کت
یکیں تئی ترانگ ءِ ترانگ چہ دل ءَ برت نہ کت

ھؤ بگندِئے منی شپ گوں تو بہ گْوستیناں پہ تب
کسہ ءِ آرگ ءِ رھبند کہ من دربرت نہ کت

چیر ءُ سر بوتگاں دائم گوں وتا چے بہ کناں
من گوں امروز ءَ وتا زیرءُ زبر کرت نہ کت

لنش ءُ لیگار منی ھوڈ ءُ نہ پلگاریں دل اَت
من دوا اے دل ءِ رئیٹائی ءِ گوکرت نہ کت

کئے من ءَ دْروھیت ءُ کئے پشت کپیت راست ءُ رداں
تئی وپاھانی گناھگار ءَ چشیں چرت نہ کت

کازی من سُتکگ ءُ پر بوتگاں دردانی چر ءَ
سد بر ءَ مرتگاں بے موت ءَ بلے مرت نہ کت

اے تاک ءَ سوشل میڈیا ءَ شنگ کنئے

Leave a Reply

Your email address will not be published. Required fields are marked *