Main Menu

منظور بسمل

مئے گناھان ءَ لِوار

مئے گناھان ءَ لِوار آپ کن انت
نیک نام اَنت کہ بھارآپ کن انت

سنج بنت بور سگار آپ کن انت
بیت اگاں کُشت ءُ کُشار کن انت

جی پہ موشنز ءُرگاماں لھمیں
کہ چو مُرگاپ کِشار آپ کن انت

گلزمین ءَ را وتی مات گُشنت
اے مزار بیم تلار آپ کن اَنت

ھئو ھمے پاس کہ کرنے کرزیت
ھئو ھمے وھد ءَ انار آپ کن انت

زھر ءُ بے زھرگی ارمان بھشت
گْواھی اِنت یکزدیں مارآپ کن انت

اے نِدارگ کجام دشت ءَ لُڈّیت
کور کنت ھار پتار آپ کن انت

بھت کُڈّ ءَ شکاری ءِ واب اِنت
رُمبے سِیسو کتار آپ کن انت

دیدگ ءِ تْران دل ءَ ھُلّ رُدیت
دوچ نکش ءُ نگار آپ کن انت

بیگھی چاڑ زھیرانی کپوت
پیش چینک ھر سھارآپ کن انت

دید آ مُرزی ءُ تُکشوک بسمل
مُرگ بے بْرمش ءُ توارآپ کن انت

دستونک

کُلمیر ءُ ‘کُرولیاں
آ بینگ بولیاں

پہ چورہاں بے ماتیں
دِلوارگ، لولیاں

بیحال کناں چوں من
زیبانی آ ٹولیاں

مہکانیں شپاں کپّگ
نیمروچ، مجولیاں

تئی گیر منی چماں
نکشانی کَڑولیاں

گِیرام کُنر چَنڈاں
آ چِیکّو چولیاں

ریپینتہ بلوچ ءَ را
کچکول ءُ کچولیاں

یدّاریں دل ءِ گْوانزگ
چِیکّینتگ انت ہولیاں

منظور کئی باگ ءِ؟
بٹاگ ءُ اے مولیاں

اے تاک ءَ سوشل میڈیا ءَ شنگ کنئے

Leave a Reply

Your email address will not be published. Required fields are marked *