Main Menu

منی ھیال چے رنگیں مردے ۔ حنیف گُلزار

دُنیا واب اِنت۔ من تہنا لوگ ء ِدپ ءَ ھمے ودارءَ اِتاں کہ شپ سپرےءِ پیما بیت، منی آوازءِ پداں گیشین اِیت ۔۔۔۔۔۔ وشبو ءِ ارواہ کَشگ بیت دُنیاءِ وابیں مردمانی جیگ ءَ جَنَگ بیت۔۔ بیا من دروازگ ءَ بند کناں۔۔۔۔
سھت باز گوستگ۔ من لوگ ءِ تَہ پترتاں من زانت منءَ ھمساھگے ھست چو آگہیں نیستیءِ رنگءَ نسیبءِ آدینکءَ چارگ اِنت۔۔۔۔۔
من واب کپاں ۔۔۔۔۔۔
پادءَ سُھب اِنت، پادءَ سُھب اِنت۔ چَمّاں پَچ کناں ۔۔۔ من گِنداں درچکانی آجویں بدن گوات ءِ صورتءَ برھنگ بنت۔ سُھب ءِ سرا کتابانی دستءَ کنگ ، اسکول ءِ سرگرگ ۔۔۔۔۔۔۔ ” منءَ دَمکانی تپلیں توارءَ یات دنت۔ زندگیءِ ھما موسم اِنت کہ من نبشتہ نہ کُتگ اَت” من ھیال کناں یک لوگے ھما لوگءِ تَہ سے 3 مردم ھست منی ھیال دیم روگءَ چہ پیسر پُرشیت ھمے جاہ ءَ منءَ سماہ نہ کنت ھیال کُجا شُت ۔ باریں بازارءَ تیابءَ یا درچکءِ چیرءَ زانگ نہ بیت، ءُ کدی کدی ہوٹل ءَ ھم روت۔ اگاں ھیال بازارءَ کید بیبیت ، بازارءِ مردمانی اھوالاں کاریت کہ مرچی سُھب ءَ کئے ءَ پیسرا دکان پَچ کُتگ۔ تیاب ءَ بہ بیت سنگارانی اھوالاں کاریت ۔ ہوٹل ءَ بہ بیت اے ھالءَ لازُم کاریت مرچی ہوٹل ءِ دپءَکئے پہ مساپری ءَ سر گپتگ۔۔۔۔۔۔ بیا بیا کُجا روگائے ۔۔۔۔۔۔۔
اے سھتءَ مردم کُجا روت بیدے لوگءَ۔ آئیءَ گپ بنا کُت بس نہ کُت۔۔ منی ھیال بازار ءِ آخری مردمءَ چارگءَ انت، باریں کُجا روت ۔ آ، کیت لوگءِ دپءَ چاریت ” دُنیا واب اِنت ، آ تہنا دروازگءِ دپءَ اُوشتاتگ ھمے ودارءَ اِنت کہ شپ سپرےءِ پیمءَ بیت ۔۔۔۔۔۔۔ ” آئیءَ گپ ھلاس کُت ۔ من آدینک ءِ دیما اوشتاتگ اِتاں گوں وتءَگپءَ اِتاں۔۔۔۔

دُنیا واب اِنت۔ من دروازگءِ دپءَ ھمے ودارءَ اِتاں کہ شپ سپرئے ءِ پیمءَ بیت۔۔۔۔۔
کسانیں میتگے لہتیں کارستانی بے رنگیں صورتاں۔۔۔ شش سال پیسر من ءَ کمئے یات بیان اِنت۔ گوات باز سارت اَت دیمترءَ من ھمے گِنداں شپ گوات لوگءِ پُرشتگیں دریگءَ سر بیت برھنگ بیت ، ھما دیر گوراستانءِ آ دیم جنگلے ھَست ۔۔۔۔ دُرائیں گپ ءُ رازاں گُشیت کدی کدی نند ءُ نیاد کنت گوں منءَ۔۔۔۔۔۔۔۔۔۔۔۔۔۔۔
اے دریگءَ بند مہ کن ” ھمے گپ آزمانکءِ کستریں کارست شاہجان ءَ گُشت” ۔۔۔ شاھجان داکتر منیرساہبءِ کستریں زھگ ءِ نام اِنت۔۔۔داکتر ساہبءِ یک زھگے پیسرءَ بیران بیتگ آئی ءِ نام مبارک بیتگ۔۔۔۔۔۔۔
شاھجان ءِ سند ھشت 8 سال اِنت داکتر ءَ یک جنکیں چُک ئے ھست اِنت نام ئے یاسمین اِنت ۔۔۔۔۔
ھیال باز جاگہ ءَ آزمانکءِ کارستاں بدل کنت، ءُ پدا منءَ سئی ھم نہ کنت۔۔۔ کدی اَنچو بیت آزمانکءِ لوٹ پیلہ نہ بنت بلے آزمانک روان انت ۔۔۔۔۔۔۔۔۔۔۔۔ نبشتہ بیان انت ۔۔۔۔
داکتر منیر اے سھت ءَ کلینک ءَ بیت۔ فرزانہ لوگءَ انت فرزانہ داکتر ءِ لوگ بانک ءِ نام انت۔۔۔
منیر ءَ بلوچستان میڈیکل سنٹر ءَ ڈاکٹری ءِ ڈگری گپتگ۔ بلے بیا کہ اے شہرءَ نوکری نیست۔ ھمے ھاترءَ منیرءَ بازارءَ کسانیں کلینکے پَچ کُتگ۔ ھمے گنجیں ٹُک ٹُک بیت لاپ کُجا بلے ھئو اللہءِ شُکر اِنت۔ داکتر وتی لوگی فرزانہ گوں گپءَ اَت۔۔۔ ھمے میانءَ شاھجان چہ وانگجاہ ءَ اَتک منیر ءَ گپ ھما سھتءَ بند کُت۔۔۔ ءُ گُشت ئے بیا منی بچ ، بیا منی بچ چی دربُرتگ چہ وتی وانگجاہءَ ۔۔ مرچی بُنگپ واب ءُ ھیال بیتگ ۔۔۔۔۔
شریں شریں پدا کایاں ھمے گُشان بیت ءُ شُت۔۔ پُرشتگیں دریگءِ دیمءَ نشت ۔ باریں چی انت جاور ھال۔۔۔۔ مرچی درچکءِ زردیں تاک کپتگاں جنگلءَ چہ تبدیں گوات پیداک انت ھمے بیتاں موسمءِ ھال۔۔۔۔
داکترءَ فرزانہ توار کت۔ پمن گلاسے آپ بیار گوں۔ نان تیار انت۔ پُرشتگیں دریگ ءَ چارگءَ اَت گوات ، زردیں تاک ، ھاکانی تردیں ترمپ شوھازءِ نمب ایں زمین ، وشبو تاکانی بازار ءَ شنگ انت زران انت پیداک انت۔ شاھجان کند ات۔۔۔۔۔
فرزانہ ءَ گُشت ” نان آں بیاراں کہ ناں”
( آزمانکار ءُ ھیال باز دیرءَ گپءَپد)

نبشتہ بیتگیں لہتیں تاک گار اِنت۔ نزاناں ءَ باریں ھما تاک کُجا بنت۔ کِسّہ گاریں تاکاں ھلاس کُت۔۔۔۔۔۔
من ھیال کناں۔۔ بُرزیں کوھے زاھرانت ۔ اناگتءَ چَمّ دگے نیمگ ئے شانک دات انت۔ دیست شوانگے گوں پساں روان انت۔ من توار کُت او ورنا تئی نام کئے انت؟ جُست کُت۔۔ آپدان، دزمال ،مُکّی گون اِتاں ۔۔۔۔۔۔
پیر جان منی نام انت۔ من ھما کسانیں بازارءَ نشتگاں ۔۔۔ ھما بازار پیر مرادءِ نام مشہور انت۔ آ کئے انت پیداک انت ؟ من پدا جُست کُت۔ آ منی براتیں نی من رواں۔۔۔۔۔۔۔۔۔

اے کسانیں میتگءَ یک وانگجاھے ھست سھب ءَ سرکاری کارگس ئے ءُ بیگاہ مُلا چُکّاں درست دنت۔ آتارگ اِدءَ وش انت سھت ئے ءَ پد روچ کوہءِ لمبءَ سر کشیت۔سبز انت ڈگار انت ھُشتر ءُ تھاڑی ، پسءُ شنک یک نیمگےکاھچر ءَ یل اَنت ھمے ندارگ باز زیبا انت۔ من تہنا ھیال کانیگ سنگرتگیں آپ ءَ گِنداں ۔ شوانگ گوں وتی براتءَ پیر مراد بازار شُت۔ من ھم ھمودا سر بان۔۔۔۔۔۔
دیم ءِ ھالاں بازار ءِ کماشیں مردءَ جست بکن ۔، اےگپ میتگءِ دیوانگءَ گُشت۔۔۔۔
شرتگءُھورءَ شمے بان نہ ریچ انت؟ ما ھم ھُداءِ ھور ھم۔۔۔۔۔
وش ات گوں شما دیوان گپءُ تران ۔ آزمانکارءَھمے گپ جت پدا شُت۔۔۔۔۔۔۔۔۔۔

منی ھیال چہ بازارءَ پیداک انت۔ من زاناں اے سھتءَ مُلا دکانءِ دیم رش بیت مردم لازُم گپءَ بنت بلوچستان ءِ جاور ھراب انت۔ جنگ انت باریں مردمانی ھال چے بیت ۔۔ ھمے سھتءَ بس ئے داشت من سوار بیتاں۔۔۔۔۔۔۔۔۔
آں باریں کُجا ۔۔۔ مبارک بازار ءَ چار راہ ءِ آدست ءَ پانءِ کیت منءَ ایر بکن بس روان انت من چاراں دُرائیں مردم ایر کپتاں ایوکءَ من پشت کپتگاں۔ جاگہ رستگ دیمءَ پانءِ دکان نہ انت ھمیشیں بدار بدار من ایر کایاں منی میتگ انت کمے دیمءَ دمک گِراں کُت۔ مسیتءَ عشاہءِ نماز ھلاس بیتگ من وتی لوگءَ رستاں کوٹیءِ تہا اتکاں دیست جنگانی اکس انت من باز ژند اتاں سر ایر کت واب شُتاں۔۔۔۔۔۔۔۔۔۔

شپ ھلاس بیت من گِنداں سھب انت مرگانی توارءَ سارتیں زیمرے شنگ انت۔۔۔ اے سھتءَ پٹانءِ ھوٹل کس نیست ۔ من سرءَ چست کناں چاراں تارانی سرا ہڈ اتگیں کانگڑو انت۔ زی ھمے بال اتاں۔۔ بُرزءَ توارانی جنگ ات چَمّانی سرا ھمچو ھاموشی انت مرچی۔ کپوتانی نمب بستگیں بانزلانی سرا روچ ترمپیں پتْریشگاں ایر کنان انت۔۔۔۔۔۔۔۔۔۔۔۔۔۔۔
دوشی باز سارت بیتگ۔ تہاری ءَ برپ بستگ۔ نی آپ بیان انت نا ھُدا یارُکؔ ءِلوگءِ سرءِبیرک ءَ بچار ھیال رنگانی تہا گار بیان انت بلے من نزانت۔۔۔۔۔۔۔۔۔۔۔

من لوگءَ اتکاں ھما گاریں تاکاں چارگءَ اتاں کہ آزمانکے نبشتہ کتگ گار انت۔ من گِنداں ھیالءَ شوھاز کتگ منزل بیا باریں چاریں تاکانی تہا چی نبشتگ۔نبشتہ ” ھاموش ھاموش۔۔۔ھچ ھبر مکن بس ھمیش انت منی ھیال واب کپتگ۔ تاک لہتیں جاگہ ءَ مین بیتگاں ۔ ھمے تاکانی تہا بس دو تاک۔۔

” منی ھیال بازارءِ آخری مردمءَ چارگءَ انت باریں کُجا روت ۔ آکیت لوگءِ دپ چاریت دُنیا واب انت۔ آ تہنا دروازگءِ دپ ءَ اوشتاتگ ھمے ودارءَ انت کہ شپ سپرئےءِ پیم بیت”۔۔۔۔۔۔۔۔۔
ھما پُرشتگیں دریگ ءِ رُژنائی ءَ جنگل ءِ بیمناکیں پاس رُدان انت۔۔
” ٹُک ٹُک ٹُک دروازگ توار کُت ۔ کئے بیت اے سھتءَ لوگ چلوپگ شے وان ءَ گُشت۔ نزیک ءَ شُت دروازگ ئے پَچ کُت۔ مردکائے اُوشتاتگ ات ، شے وان ءَ جُست کُت تو کیا لوٹ ئے۔ ڈاکٹر ساہب کُج انت ۔ آئی گُشت۔۔۔

اے سھتءَ ڈاکٹر کلینکءَ بیت شے وانءَ گُشت۔بلے تئی نام کئے انت؟ ھیر انت؟
منی نام منی نام یارُک انت من ءَ لہتیں روچ بیت من اے میتگءَ اتکگاں۔۔ من یکےءَ گُشتگ اِدءَ ڈاکٹرے ھست شر انت۔۔۔۔۔۔۔۔

اے تاک ءَ سوشل میڈیا ءَ شنگ کنئے


« ( (Previous Post) پشتءِ نبشتانک )
((Next Post) دیمءِ نبشتانک ) »



Leave a Reply

Your email address will not be published. Required fields are marked *