Main Menu

مجید عاجز

کریچیں جوزگانی روک

کریچیں جوزگانی روک ، آس بووگا نہ اِنت
کہ اِشک تئی پَلیتَگے وتاس بووگا نہ اِنت

ازاب مَرگیں زندگی ھدا بہ زانت چِہ کِسّہے
ہلاس کُرتگ ئِے من ءَ ، ہلاس بووگا نہ اِنت

چہ کْواپگیں چِڑِکّہاں مں بے توار بوتگاں
منی کہ جند گوں منا شُناس بووگا نہ اِنت

تاں کَندھے ءَ اتکگاں تہ نوکی پَھمگ ءَ آں ، کہ
اے کِشک مارے پہ من ءَ ، سواس بووگا نہ اِنت

تھارگیں شپے من ءُ منی چِرتّیں چیپگ اَنت
چراگیں بُنڈ گُنگی ءِ بُناس بووگا نہ اِنت

اے کور دیدیں دَلوتانی گُنگدامیں جنگلے
ادا کساس عاجز ءِ کساس بووگا نہ اِنت

من کہ مُرتاں مِرَگ وا گپّے نہ اِنت

من کہ مُرتاں مِرَگ وا گپّے نہ اِنت
نا گُماں اِنسِرَگ وا گپّے نہ اِنت

کور داں کہ نبشتھاں مہ کنئے
کاگدانی دِرَگ وا گپّے نہ اِنت

تو کہ گاریں مہیمّے ءَ ، تھنا
سرگِرئے ، سر گِرَگ وا گپّے نہ اِنت

چو کہ زوراک ئے ، گْریوگاں مئے بہ پُل
کندگاں پچگِرَگ وا گپّے نہ اِنت

روچ ٹَلّاتگ مانش ءَ من وتی
آسُکے ءِ شِرَگ وا گپّے نہ اِنت

دَز بگر شیشگیں دل ءَ کہ پْرشیت
عاجز ءِ دَز گِرَگ وا گپّے نہ اِنت

اے تاک ءَ سوشل میڈیا ءَ شنگ کنئے

Leave a Reply

Your email address will not be published. Required fields are marked *