Main Menu

کلپورگ ۔ نوربشام

انچش کہ شما سرپد ات کہ ما چہ لھتیں چیزاں وت ءَ را بیھال ءُ شموشکار کتگ انت بلے اگاں ما بچاریں مارا وتی درچک ءُ دار جک ءُ بُرْ بیھال کنگی نہ انت چونھا انچوش گوں وھد ءِ ھمراھی ءَ ما وتی بازیں چیزے شموشتگ ءُ پھک بیھال کتگ نوں چہ ھمے جک ءُ براں یکے کلپورگ انت کہ یک کسانُکیں درچکے کہ کوہ سر تگنانی سر ءَ رود ایت ءُ بھارگاھاں گلزار بیت ءُ ڈکالی سالاں ھشک تر ایت ءُ تاکی شپ انت ءُ ھشکیں دارکے بیت کلپورگ ءِ درچک سک کسان انت مزن نہ انت رنگی پُراھکی رنگے بلے بھارگاھاں تاکی کمو سبزگ دار انت منی ھیال ءَ اے درچک مئے کلیں بلوچستان ءَ دست کپیت ھم بوت بہ کنت کہ ھر جاگہ مہ بیت بلے گیشتریں ھند ءُ دمگاں امیت انت کہ دست کپیت۔
ما دورمہ جنز اِیں وتی نزیکی گور ءُ ھند ءُ دمگ ءُ میتگانی جَرّ ءُ درچک ءٌ داراں بہ چاریں کہ پاکیں پرودگار ءَ ما چونیں چونیں گنج ءُ ھزانگ داتگ ءُ بکشاتگ کہ اشانی واھند ما ءُ شما وت اِن مئے وھدگیں مردمانی ھرچ وڑیں سھت ءٌ سکی ءٌ ھمک وڑیں نادراھیانی وش کنوک وَ پاکیں ھاوند وت بوتگ بلے شر یَت ھمے جک ءٌ برْ بوتگ انت کہ آیاں وتی نادراھی ءُ جاندراھی ءِ واست ءَ ھمے درچک ءُ دارانی جک ءُ بر کارمرز کتگ اَنت ءُ چہ ھمے جَک ءُ بُرانی کارمرز ءُ ورگ برکت ءَ آ وش بوتگ ءُ جاندراہ ءُ جان سلامت بوتگ اَنت اگاں کجام یک ءَ ھدا نہ واست ءَ چونیں نادراھی ءَ گپتگ گڑا ھمے درچک ءٌ دار جک ءٌ بٌر آیانی داکتری دَوائیانی بدل بوتگ انت ءُ آیانی وشکنوک بوتگ انت ھیر نوں من کلپورگ ءِ بابت ءَ چیزے پہ وتی نزوریں زانت ءَ شمارا سرپدی دیاں انچوش کہ من برز ءَ شمارا گشت کہ کلپورگ یک کسانکیں درچکے ایشی ءِ رنگ پرٌاگو انت اے زیادہ بھارگاھاں بیت بلے اد ءَ شمارا گشاں کہ ایشی ءِ تاک سک پتن نہ انت اے گیشاں چہ گیش شیپ ءٌ جٌگّر ءُ ساگور ءُ تاپ ءُ ڈنسریں جاگاھاں رود ایت پٌلے کمک اسپیت چَک جن انت کلپورگ ءِ . بوُ سک باز سارت انت ءُ وشیں بوُکنت وھدیکہ مردمی دست پر کنت آ وتی بُو ءَ پشار ءُ آتار دنت ءُ دلاں سارت ترینیت ءُ وجود ءَ شادان ءُ دل ءَ وشنود کنت پہ مئے جان سلامتی ءَ اے کلپورگ ءَ بازیں ھمتے گون !!!!!! ۔
کلپورگ پہ لاپ درد ءِ واست ءَ ، لاپ رِچگ ءَ یک ءُ ٹک انت ءُ باز شر انت ءٌ دومی پہ نونکیں چکاں و یک شپا بکشیں ءُِ بھتریں دوا ءُ درمانے ھرچ وھد ءَ چکے باز بہ گریت کلپورگ ءَ گراد اَنت ءُ بہ دیئنت ئے آ چہ گریوگ ءَ جاپ دنت ءُ آئی ءِ درد ءُ دور ترْھنت ءُ آ وش بیت دگہ اگاں کجام مردمے کہ آئی ءِ لاپ درد کنت ءُ تہ ءَ زیم اِنت ءُ گوات بہ زور اِیت آ کلپورگ ءَ گوں بینگ ءَ ھوار بہ کنت چو گولی ءَ گِلڑ بہ کنت ءٌ تاں دھ ءٌ بیستی روچ ءَ سھب ءَ اَناوار ءَ بوارت ءُ کارمرز ئِے بہ کنت پاکیں ھاوند ءِ زور ءُ کمک ، کدرت ءَ وش بیت اگاں کسے ءِ گور ءَ.بینگ نیست کلپورگ ءَ انچش گوں آپ ءَ ھم وارت کنت دگہ یکے اگاں پہ مساپری ءَ چشیں مسیبت ءُ مشکلے گپت ءُ لاپ درد ءٌ شیکم ئِے شت کلپورگ ءِ تاکاں سر بہ چنت ءٌ بوارت ھما دمان ءَ دراہ بیت بلے اگاں آئی ءَ راہ ءَ ھمے کلپورگ گیر ءَ اتک۔کلپورگ گیشتر پہ لاپ ءِ نادراھاں شر انت۔
دگہ یکے کہ کلپورگ ءَ بھار گاھاں بہ چن ءُ ایر کن وھدے ھشک بوت نوں چوپ ءُ شر ھُرت ئِے کن پد ءَ درپ ءُ پوتینکانی تہ ءَ ایر ئِے کن ھر وھد کہ یکے ءَ چشیں ویلے ءَ گپت بدی ئے ھما دمان ءَ وش بیت پد ءَ شرتریں گپ اش انت کہ کلپورگ پہ ایر کنگ ءَ ھچبر ھراب نہ بیت آ وھد ءَ اے جک ءُ بُر ءُ دَوا ھرچ لوگاں بوتگ انت ءَِ مئے کماش ءُ پیر زالیں بلکانی اُرداں مدام بوتگ انت دگہ گپے کلپورگ ءَ سرشپ ءَ آپاں کن اَنت ءُ سھب ءَ اناوار ءَ ور انت ئے بلے ھما مردم کہ چہ وتی لاپ درد ءُ زیم ءُ گوات ءِ نادراھی ءَ گپتگ ءُ بے تاھیر انت گڑا ھمے آپاں ساپیں گدے ءَ پالائیت ءُ بوارت رک ایت ءُ دراہ بیت اگاں یکے ءِ لاپ ھراب بوت یا مئیدہ بزان شیکم ئے بار بار شت یا بہ روت ءُ لاپی بہ ریچیت گڑا آ پہ ھما دمان ءَ کلپورگ ءَ بہ زور ایت ماں آپانی توک ءَ َ لھڑ بہ دنت ءٌ بوارت ھم ھما دمان ءَ دراہ بیت مارا مئے پاکیں روُدینوکءَ بازیں ِ گنج بکشاتگ بلے بژن کہ ما ھچ ءَ سرپد نہ اِن مارا اِلم وتی کلیں درچک ءٌ دار ءٌ جک ءٌ برانی بابت ءَ سرپدی نیست بیا ات کہ شوھازیں وتی ھمےگنجاں کہ مئے ڈیھ ءَ ھست اَنت ءُ پاکیں پیداگ کنوک ءَ مارا بکش اِتگ انت۔

اے تاک ءَ سوشل میڈیا ءَ شنگ کنئے


« ( (Previous Post) پشتءِ نبشتانک )
((Next Post) دیمءِ نبشتانک ) »



Leave a Reply

Your email address will not be published. Required fields are marked *