Main Menu

ھَت ۔ پولکار ۔ نور بشام

من گٌشاں ھَت باز مردٌم ھیران بیت کہ ھَت چے ئے؟
چے ءَ کہ مارا زانت ءُ سرپدی نیست ھمے ھاتر ءً نیست آنگو شما وت زان اِت کہ مامدٌام دنیا ءِ ھما چیزانی سر ءَ دلگٌوشداری کن ایں کہ مئے دیم ءَ آدینک انت آ کہ مئے بن پیرُکی زند ءِ ھمراہ بوتگ انت آیانی بابت ءَ ما ھچبر نہ جیڑ ایں ءُ شوھاز کاری نہ کن ایں۔ بلے اگاں ما جھد بہ کن ایں مارا جوانیں سرپدی رست کنت ءُ رسیت چے ءَ کہ چیزانی زانت پہ ما المی انت کہ مئے تہ ءُ توکاں اے درچکانی بابت زانت ءِ بہ زانت بہ بیت پہ وتی وتن ءِ درچک ءٌ داراں اے نہ کہ ھاسکن اے درچک ءُ دار ءُ جک ءُ بُرانی بلکیں سرجمیں بلوچستان ءِ گنجانی بارو ءَ مارا سرپد بوگی انت دگر اناں مارا وت اے سرپدی بہ بیت کہ مئے وتن بلوچستان یک تِیوگیں تِلاہ ءُِ تنگہ ءُ زند ءِ آسراتیءِ ھمک گنج ءُ گنیمتانی سرپدی پہ ما اژدری انت۔ پاکیں ھاوند ءَ مئے ملک چہ گنج ءُ گنیمت ءَ پٌر کتگ ءُ ھرچ وڑیں گنجانی کلات زانگ بیت ءُ کلات انت، مئے ڈیھ پُر ءُ سرریچ اِنت بس مارا ھمے شوھاز کنگ لوٹ اَنت، ما پرچیا گڑا چہ وتی گنجاں چہ نپ ءٌ سیت نہ زور اِیں باید کہ ما چہ وتی اے درچک ءُ داراں وت سرپدی بہ زور ایں ءُ آ دگراں ھم سرپدی بدی ایں۔
ھمے داب ءَ من مروچی شمارا ھَت ءِ بابت ءَ چیزکے سرپدی گوں وتی نزوریں زانت ءَ دیاں کہ بارین اے ھَت چی ئے ءُ مارا چہ ِ ھَت ءَ چے سِت ءُ نَپ رس اِیت، ھَت یک درچکے چہ بٌن بیھ ءَ یک گونڈلکیں درچٌککّے بیت کہ ماں کوھانی دیم ءَ بلے ساگورانی دیم ءَ رٌود ایت ھمے داب ءَ رُودان کنت ءُ یک بَلاھیں درچکےِ جوڑ بیت ایشی ءِ تاک سبز بنت ءُ بَرّی کسان بنت، اے ھر وھد ءَ سبز انت ماں ساگْورانی دِیم ءَ ڈُکالیں سالاں اے درچک ءِ سبزی کمو زرد تر ایت بلے ھشک نہ بیت۔ ایشی ءِ تاکاں پس ھشتر دگہ دگہ ھَنچیں ساہ دار ھست انت کہ ورانتِ اِش پہ وھدگیں مردٌمانی واست ءَ ھَت ءِ یک بلاھیں پائدگے ِ بوتگ وھدیکہ چاھی تاک نہ بوتگ گُڑا ھمے ھَت ءِ تاک مردمانی چاہ ءِ بدل بوتگ ءُ ھَت ءِ تاک چاھان کتگ ءُ وارتگ انت ھَت ءِ چاہ سک وش اِنت پمے ھاتر ءَ ھَت ءِ تاک اِِش ککَرتگ انت ءٌ آورتگ ءُ وتی لوگاں ھٌشک کتگ انت ءُ وتی چاھی تاکانی بدل اِش کتگ انت۔

دومی ھَت ءِ دار پہ زمستانی شپاں مئے گریب ءُ بزگرانی گوْھر ءُ سکیں سارتی ءُ ٹنَٹانی رکینٌوک بوتگ انت ھَت ءِ دار پہ سوٌچگ ءَ باز رو کنت پد ءَ زوت روک بیت آسے باز زیبدار انت ءُ ھت ءِ دار سک ڈولدار اِنت۔ دگہ شپانکاں کہ وھدےکوھاں کجٌام جاہ ءَ کہ ھَتے ِ دیستگ گٌڑا وتی تٌومی ِ پاچِن اِش توار جتگ ءُ ھَت ءِ شاہ ءِ اش پٌروشتگ ءُ وتی پاچناں داتگ انت، چے ءَ کہ شوانگ ءِ ھب ءُ واھشت مُدام گوں وتی تٌومی پاچِن ءَ بیتگ ءُ ھت ءِ تاک پس ءَ سک پزور کنت جان ءِ زند مان کنت۔ ھمے داب ءَ ھَت ءِ دار ءِ لَٹ باز مُھر ءُ مُھکم اِنت وھد ءِ کماشاں مُدام ھَت ءُ آرچِن ءِ لَٹ ئِے باز شوک ءٌ شان بوتگ ھِت ءِ لَٹ باز زیبدار ءُ ڈولدار انت ءُ سک مٌھکم انت. ھت ءِ دو تھر ھست یک ھتے ءِ دار اسپیت اِنت ءُ یکے ءِ دار سیاہ اِنت سیاہ داریں ھت ءَ گر ھت گوش اَنت ءُ اے ھت ءِ دار ءِ بو سک وش اِنت ءُ چو چندن ءِ وڑیں وشیں بوھے کنت۔
اسپیتیں ھت ءِ دار چو آ دگہ درچکانی وڑ ءَ انت بلے مھریں دارے، ھَت پہ نادْراھاں ھم یک شرتِر ءُ گِھتِریں الاجے بوتگ، وھد ءِ زمانگ ءَ ِ کہ یکے ءِ پادگانی دل سک سوتکگ انت گڑا ھَت ءِ تاک اش زرتگ ءُ آپان کتگ انت ءُ پادگ اش ھمے آپانی تہ ءَ کتگ انت تانکہ دھ ءُ بیست ھین ءُ دمان ءَ سے چار روچ ءَ رند آئی ءِ پادانی درد شتگ ءُ گار بوتگ پہ ھکم ءِ پاکیں ھاوند ءَ دراہ کتگ ءُ آ وش بوتگ، مئے ڈیھ ءِ درچک ءُ دار پہ ما باز پائدگ مند اَنت ءُ ھمے ھساب ءَ مئے اٌستاھانی دل پسندیں دار ھَت بوتگ آیانی کار گیشاں چہ گیش چمے ھَت ءِ داراں شر بوتگ انت آیاں پہ کارئیگِرانی جٌگ ءُ شتنگاں ءُ داس ءُ کار چانی دستگ جَلک ءُ سٌرود ءُ تمبورگ ءُ دگہ باز یں چیزے ھست انت کہ چمے ھَت ءِ داراں چہ جوڑ کتگ انت چے ءَ کہ اے ھت ءِ دار سک مھر انت۔
دگہ یکے کہ پہ لوگ ءُ کَرگینانی بندگ ءَ ھَت ءِ دار سک باز مُ ھر ءُ مٌھکم انت مردماں مدام ھَت ءِ دار پہ وتی لوگانی مِنگانی واست ءَ سک دوست بوتگ انت چےءَ کہ ھَت ءِ دار ءَ باز اٌمْر ھَست رمیز یا وروک ھت ءِ دار ءَ پہ بیھ نہ وارت بلے مستریں چیز ھمیش انت کہ مارا ھچ سماء نیست کہ اللہ ءَ مارا چونیں گنجیں ڈیھے واھند کتگ، ما چہ ھمے گنجاں پائدگ چِست بہ کن ایں ءُ وتی ملک ءِ درچک ءُ دارانی نپ ءَ پہ وتی پدریچاں سرپدی یے سرپد بہ بہ ایں اے مارا الم زانگ لوٹ ایت کہ وتن مئے چہ گنجان پُر انت، بلے ما چہ وتی ھمے گنجاں وتارا وت زِھبر کتگ، چٌشیں گنجاں چہ ما بائد انت کہ پائدگ بہ ٌزورین ءُ وتی دلاں چہ ھمے پاکیں ھاوند ءِ داتگیں گنجاں تاھیر بہ بکشیں۔

اے تاک ءَ سوشل میڈیا ءَ شنگ کنئے


« ( (Previous Post) پشتءِ نبشتانک )
((Next Post) دیمءِ نبشتانک ) »



Leave a Reply

Your email address will not be published. Required fields are marked *