Main Menu

غلام حسین شوہاز

روچ گوں ھزار رنگیں گماں

روچ گوں ھزار رنگیں گماں کیگد منی بیگاہ بیت
شپ گوں تئی زپتیں زھیرءُ ترانگاں بانگواہ بیت

چوں چوں گوزیت باریں  منی لنجءُ تھاریں زندگی
مرتگ منی زندءِ چراگ باریں کد ی روژناہ بیت

جندوں وتی ھیرات کت من سر وتی قربان کت
من ھچ  نزانتگ کہ منی ھمبل منی بدواہ بیت

کج واریءِ  تژنءَ  مجن مارا جھانءِ دیمءَ تو
یکے گریبءُ وار بیت یکے امیرءُ شاھ بیت

شوھاز مبو تو دلپروش دنیاءِ دودانت دائمی
گوں بزگرءُ گوں بے دراں مرچاں کئے انت ھمراہ بیت

مھرءِ شررنگیں جھاناں

مھرءِ شررنگیں جھاناں من جھاں پیداکاں
رُہ بَریں زندءِ گماناں پہ گماں پیداکاں

مارا بیگواہ نہ کنت دھرءِ دریں بیگواھی
من وتی رندءَ تچاناں من تچاں پیداکاں

سوچ سَتر سوچ منا سوچکءِ سچوکیں سوچکاں
چوچشیں دارءَ سچاناں من سُچان پیداکاں

درش درشءَ دروش درشوکیں پہ عجب دروشاں کن
درشتگیں دانءَ دروشاناں من دروشاں پیداکاں

توزَرءِ پہ من بہ زَر کہ منی زند زرایت
دل زریت بیا کہ زراناں من زراں پیداکاں

شل منی ارس شل شل انت شل شلیں نودی شل
شل شلاں بی کہ شلاناں من شلاں پیداکاں

اے تاک ءَ سوشل میڈیا ءَ شنگ کنئے