Main Menu

بہ چن اے کوش ءِ زیمر ءَ ۔ جاوید دینؔ

بے چن اے کوش ءِ زیمر ءَ
کپوتے ءِ گورا بدئے
من اشکُتگ تئ میتگ ءَ
چراگ برھنگ اَنت
تہاری ءَ گَلے چتہ ءُ پُلاں وتکُشی کتگ
سباہ نہ سار اتگ
نہ بیگہءَ زہیر مینتگاں
نہ مولماں دلے پہاز اتگ
رگام رتکیں جمبراں
نہ بُتکہ سنجے کیمتی
دریگاں چاکری کتگ
من نشتہ سئیل چار اتگ
چو مُرگے ءَ
چو درچکے ءَ
چو بے وسیں یتیمےءَ
تئ پژگاھءَ کپتگاں
مریدی ءِ گم ءَ وتی
گنوکیءَ مں دست بستگاں
کئی درا
کئےءَرا لوٹتگ چہ کئی گورا
بہشت ایں زید ءِ ساھگاں
اے مچکدگ نہ مُرتگ اَنت
نہ ھُشتگ اَنت مئے کوھ ءِچمگوں تنیگتہ
بگندئے مئیماں بال کتگ
جہاں گُبارےءَ گوں سئیلیتگ
من گِلھانی بُکچہے سرا کتہ
سفر گوں ساھگ ءَ بنا کتہ
گوں گوات ءِ کولے ءَ ھبر کتہ
ترا مں گُشتہ زندگی
بہ چن اے کوش ءِ زیمر ءَ
کپوتے ءِ گورا بدئے

اے تاک ءَ سوشل میڈیا ءَ شنگ کنئے





Leave a Reply

Your email address will not be published. Required fields are marked *